याङ्गुन । गत फेबु्रअरीमा म्यानमारको नागरिक सरकारलाई अपदस्थ गरी कू गरेको सैनिक सरकारकोे विरोध गर्दैै प्रदर्शन गरेको आरोपमा जेलमा परेका पाँच हजारभन्दा बढी व्यक्तिलाई रिहा गरिने भएको छ ।
सैनिक सरकारका प्रमुख मिन आङ ह्लाइनले सोमबार दिनुभएको जानकारीअनुसार अक्टोबरको अन्त्यमा थन्डिथयुत पर्वको उपलक्ष्यमा पाँच हजार ६३६ कैदीलाई रिहा गरिने भएको हो ।
एक क्षेत्रीय शिखर सम्मेलनको क्रममा म्यानमारमा हाल जारी सङ्कटलाई कम गर्ने आफ्नो सरकारको प्रतिबद्धतानुसार म्यानमार सैन्य सरकार प्रमुखको उक्त घोषणा आएको छ ।
प्रजातान्त्रिक सरकारको कू भएपछि यसको विरोधको क्रम सुरु भएको र यसबाट देशमा अराजकता छाएको छ । कूको विरोधका प्रदर्शन गर्ने व्यक्तिहरूलाई सैनिक सरकारले गरेको कारबाहीको क्रममा एक हजार १०० भन्दा बढी नागरिक मारिनुको साथै आठ हजार भन्दा बढी गिरफ्तार भएको एक मानव अधिकारवादी समूहले जानकारी दिएको छ ।
अझै पनि सात हजार ३०० भन्दा बढी प्रदर्शनकारी देशभरका जेलमा रहेको राजनैतिक कैदीको सहायतासम्बन्धी एक संस्थाका अधिकारीहरूले जानकारी दिएका छन् ।
जुलाई महिनामा देशभरका जेलबाट दुई हजारभन्दा बढी सैनिक सरकार विरुद्धका प्रदर्शनकारीलाई रिहा गरिएको थियो । रिहा गरिएका यी व्यक्ति सैन्य सरकारको आलोचना गर्ने पत्रकारसहित विभिन्न क्षेत्रका नागरिक रहेका छन् । (रासस/एएफपी)
