काठमाडौं । भारतको जम्मु कस्मिरमा आतंकवादी हमलामा परी नौ जना भारतीय सैनिकले ज्यान गुमाएका छन् । सोमबारदेखि सेना र अतिवादी समूहबीच जारी लडाइँमा अहिलेसम्म २२ जनाको मृत्यु भएको छ ।
भारतको केन्द्र सरकारद्वारा शासित प्रदेश जम्मु–कस्मिरमा मुठभेडका क्रममा अतिवादी समूहका १३ जनालाई मारिएको भारतीय सेनाले दाबी गरेको बीबीसी हिन्दीले जनाएको छ ।
भारतीय सेनाले गत सोमबार सरनकोटको एक गाउँबाट आतंकवादी समूहविरुद्ध अपरेसन सुरु गरेको थियो । अहिले पनि सेना र आतंकवादी समूहबीच पुँछ र राजौरीको घना जंगलमा लडाइँ चलिरहेको बीबीसी हिन्दीले जनाएको छ।
यसबीच कस्मिरको कुलमागमा आइतबार गोली हानेर दुई जना गैरकस्मिरी नागरिकको हत्या गरिएको छ। भारतीय सञ्चारमाध्यमका अनुसार आतंकवादीद्वारा उत्तर प्रदेशको सहरानपुरका सगिर अहमद र बिहारको बाँका क्षेत्रका अरविन्द कुमार साह मारिएका हुन्।
त्यसअघि शनिबार पनि आतंकवादीले दुई जना मजदुरको हत्या गरेका छन्। सर्वसाधारणको हत्याले कस्मिरका राजनीतिक दल आक्रोशित भएका छन्।
यसपछि भारतीय सुरक्षा बलले थालेको अपरेसन अभियानका क्रममा १३ जना आतंकवादी मारिएको दाबी गरिएको छ।
आतंकवादी समूह र सेनाबीच मुठभेड चलिरहँदा जम्मु–कस्मिरमा आतंकवादीलाई सहयोग गरेको आरोपमा सरकारी कर्मचारीलाई बर्खास्त गर्ने अभियान पनि चलिरहेको छ।
पछिल्लोपटक जम्मु–कस्मिर प्रशासनले अलगाववादी नेताका रूपमा परिचित सइद अली शाह गिलानीका नाति अनिल उल इस्लाम र एक जना शिक्षकलाई जागिरबाट निकालिएको भारतीय सञ्चारमाध्यमले जनाएका छन्।
