नयाँदिल्ली । भारतीय प्रधानमन्त्री नरेन्द्र मोदी संयुक्त राज्य अमेरिकाको तीन दिनको भ्रमण क्रममा बुधबार प्रस्थान गर्नुभएको छ ।
संयुक्त राष्ट्र सङ्घको महासभालाई सम्बोधन गर्ने र क्वाड शिखर सम्मेलनमा भाग लिनुका साथै उहाँले ह्वाइट हाउसमा अमेरिकी राष्ट्रपति जो बाइडेनसँग भेटवार्ता गर्नुहुने छ ।
आगामी सेप्टेम्बर २४ का दिन ह्वाइट हाउसमा प्रधानमन्त्री मोदीको अमेरिकी राष्ट्रपति बाइडेनको भेटवार्ता हुने छ । गत २० जनवरीमा अमेरिकी राष्ट्रपति पद बाइडेन सम्हालेपछि यी दुई नेताबिच पहिलो व्यक्तिगत भेटवार्ता हुन लागेको भारतीय विदेश सचिव हर्षवर्धनले जारी गरेको विज्ञप्तिमा जनाइएको छ ।
प्रधानमन्त्री मोदी र राष्ट्रपति बाइडेनबिच कट्टरपन्थीलाई रोक्न र आतङ्कवादसँग लड्ने उपायबारे छलफल हुने छ । त्यस्तै, उहाँहरूबिच रक्षा, व्यापार सम्बन्ध, सुरक्षा सहयोग र स्वच्छ ऊर्जा साझेदारीलाई अझै बलियो बनाउने उपायबारेमा छलफल हुने अपेक्षा गरिएको छ । एवम् प्रकारले प्रधानमन्त्री मोदी र बाइडेनमाझ अफगानिस्तानको हालको घटनाक्रमपछिको वर्तमान र क्षेत्रीय सुरक्षा स्थितिबारे छलफल हुने छ ।
प्रधानमन्त्री मोदीकोे सेप्टेम्बर २२–२५ सम्मको अमेरिका भ्रमणको क्रममा व्यापारिक अन्तरक्रिया पनि गर्नुहुने छ । प्रधानमन्त्री मोदी शुक्रबार अमेरिकी राष्ट्रपतिद्वारा आयोजित क्वाडको शिखर सम्मेलनमा भाग लिनुहुने छ । यस सम्मेलनमा जापानका प्रधानमन्त्री योसिहिदे सुगा र अस्ट्रेलियाका प्रधानमन्त्री स्कट मोरिसन सहभागी हुनुहुने भएको छ ।
प्रधानमन्त्री मोदीले सेप्टेम्बर २५ मा न्युयोर्कमा संयुक्त राष्ट्र सङ्घ महासभा (युएनजिए) को छयहत्तरौँ सत्रलाई सम्बोधन गर्नुहुने छ ।
