ब्राजिलिया । ब्राजिलका स्वास्थ्यमन्त्री मार्कोलो क्वैरोगा कोरोनाबाट सङ्क्रमित हुनुभएको छ । संयुक्त राष्ट्र सङ्घको महासभामा सहभागी भएपछि उहाँलाई सङ्क्रमण पुष्टि भएको अधिकारीहरूले मङ्गलबार जानकारी दिएका छन् ।
राष्ट्रपति जैर बोल्सोनारोको नेतृत्वमा ब्राजिलको टोली अमेरिकाको न्युयोर्कमा भएको राष्ट्र सङ्घको महासभामा सहभागी भएको थियो ।
टोलीमा सहभागी अन्य सदस्यको पनि कोरोना परीक्षण गरिएको तर सङ्क्रमण नदेखिएको अधिकारीले जनाएका छन ।
ब्राजिल सरकारले जारी गरेको वक्तव्यका अनुसार अहिले सङ्क्रमित हुनुभएका स्वास्थ्य मन्त्री क्वैरोगाले कोरोना विरुद्धको खोप पनि लगाउनुभएको थियो । राष्ट्र सङ्घको महासभामा सहभागी भएर फर्किएकामध्ये सङ्क्रमित हुनेमा उहाँ दोस्रो व्यक्ति हुनुभएको छ ।
सङ्क्रमित ५५ वर्षीय स्वास्थ्यमन्त्री क्वैरोगा न्युयोर्कमै आइसोलेसनमा बस्नुभएको समाचारमा जनाइएको छ तर टोलीमा सहभागी भएर पनि सङ्क्रमण पुष्टि नभएका अन्य भने ब्राजिल फर्किसकेका छन् । राष्ट्रपति बोल्सोनारो यात्राका क्रममा मास्कबिना देखिनुभएको र उहाँले अहिलेसम्म खोप पनि लगाउनुभएको अधिकारीहरूले जनाएका छन् ।
स्वास्थ्यमन्त्री क्वैरोगासँगै रहनुभएका बोल्सोनारोले महासभाका क्रममा अन्य देशका शीर्ष नेताहरूसँग पनि भेटवार्ता गर्नुभएको थियो तर अहिलेसम्म पनि उनीहरूलाई सङ्क्रमण भएको जानकारी नआएको वक्तव्यमा उल्लेख छ । (रासस/एएफपी)
