काबुल । अफगानिस्तानस्थित इस्लामिक स्टेट समूह विरुद्धको हवाइ आक्रमणमा आइएस–के समूहका सदस्यको मृत्यु भएको अमेरिकी सेनाले बताएको छ । अमेरिकाले नानगहार प्रान्तमा गरेको कारबाहीमा एउटा ड्रोनको प्रयोग गरिएको शनिबार पुष्टि भएको छ ।
यसअघि अमेरिकी सैनिकले काबुल विमानस्थलमा सुरक्षा दिइरहेका समय बिहीबार विमानस्थलनजिकै १७० जनाको ज्यान लिने गरी उक्त समूहले आक्रमण गरेको थियो । काबुल विमानस्थल बाहिर उद्धारको पर्खाइमा रहेको महिला, पुरुष र बालबालिकाको भिडमा उक्त आत्मघाती विस्फोटन गराएइको थियो ।
आइएस–केले विमानस्थलमा भएको आक्रमणको जिम्मेवारी लिएको बिबिसीले बताएको छ । सो समूहले काबुल विमानस्थल बाहिर रहेको महिला, पुरुष र बालबालिकाको भिडमा आत्मघाती विस्फोटन गराएको थियो ।
अमेरिकाले नानगहारमा गरिएको ड्रोन आक्रमणबारे प्राप्त प्रारम्भिक सङ्केतले इस्लामिक स्टेटका सदस्य मारिएको र कुनै पनि गैरसैनिक हताहत नभएको बताएको छ ।
अमेरिकी राष्ट्रपति जो बाइडनले बिहिबारको आत्मघाती आक्रमणमा संलग्न जिहादीलाई अमेरिकाले नछाड्ने बताएको केही घण्टापछि उक्त कारबाही गरिएको छ । (रासस/एएफपी)
