काबुल । अफगानिस्तानको उत्तरी प्रान्त तखारको प्रान्तीय राजधानी तालुकान सहरमा तालिबान लडाकुले गरेको आक्रमण विफल भएको छ । ती लडाकु सो सहर कब्जाको लागि आक्रमण गरिरहेका थिए छ ।
सो आक्रमणको क्रममा २८ जना आतङ्ककारी मारिएको सरकारी स्रोतले मङ्गलबार जानकारी दिएको छ । सेनाको प्रवक्ता अब्दुलहादी नाजारीका अनुसार तालिबान आतङ्ककारीले तालुकान सहरलाई विभिन्न दिशाबाट आक्रमण गर्ने योजना बनाइरहेका थिए । तर लडाकु विमानको सहायतामा सेनाले गरेको कारबाहीको क्रममा २८ तालिबान लडाकु मारिएका छन् ।
यस कारबाहीको विषयमा तालिबान लडाकु कुनै टिप्पणी गरेका छैनन् । तालिबान लडाकु समूहले तखार प्रान्तका १६ ओटा जिल्लाका केन्द्र नियन्त्रणमा लिएको र विगत एक महिनादेखि राजधानी काबुलबाट २४५ किलोमिटर उत्तरमा रहेको प्रान्तीय राजधानी तालुकान सहर कब्जा गर्न आक्रमण गरिरहेका जनाइएको छ ।
यसैबिच, तखारका बासिन्दाले गत एक सातादेखि अफगानिस्तानको राजधानी काबुलमा धरना दिएको बताइएको छ । केन्द्र सरकारलाई तखारमा थप सेना पठाउन आग्रह गरेका छन्, अन्यथा प्रान्तीय राजधानीसहितको प्रान्त तालिबानले लिने उनीहरूको भनाइ रहेको छ । (रासस/सिन्ह्वा)
