सउल । दक्षिण कोरियामा कोभिड १९का सङ्क्रमितको सङ्ख्या बढ्दै गएको देखिएको छ । यहाँका अधिकारीहरूले गत शनिबार कोभिड १९ को चौथो वेभको सुरुवात भएको बताएका थिए ।

दक्षिण कोरियाका अधिकारीहरूले दिएको जानकारीअनुसार यहाँ गत २४ घन्टायताको तथ्याङ्क हेर्दा कोभिड १९ का सङ्क्रमित एकैदिनमा धेरै अर्थात् एक हजार ६०० जना भेटिएको बताएका छन् ।

हुन त अघिल्लो दिनको तुलनामा यहाँ १५ जना घटेका छन् । मङ्गलबार दक्षिण कोरियामा एक हजार ६१५ जना भेटिएका थिए । दक्षिण कोरियाका अधिकारीले दिएको जानकारीअनुसार यहाँ गत छ महिनापछि एकैपटक यति धेरै सङ्ख्याका सङ्क्रमित पहिलो पटक देखिएका हुन् । यहाँका अधिकारीले दक्षिण कोरियामा गएको दश दिनदेखि निरन्तर रूपमा कम्तीमा पनि एक हजार जना सङ्क्रमित देखिएका हुन् ।

योसँगै दक्षिण कोरियामा कोभिडका सङ्क्रमितको सङ्ख्या १ लाख ७३ हजार ५११ जना पुगेको बताइएको छ । यहाँ पछिल्ला केही हप्तायता देखि कोभिडका सङ्क्रमितको सङ्ख्या बढ्दो देखिएको छ । पछिल्ला हप्तामा यसरी सङ्क्रमितको सङ्ख्या बढेपछि दक्षिण कोरियाका स्वास्थ्य अधिकारीले यहाँ कोभिडको चौथो वेभ सुरु भएको बताएका हुन् ।

दक्षिण कोरियाको स्वास्थ्य मन्त्रालयले यही जुलाई १ देखि यता देशैभरि सङ्क्रमितको सङ्ख्या बढेको बताएको छ । यहाँ पछिल्ला केही दिनयताको देशव्यापी तथ्याङ्कको हिसाब गर्दा अघिल्ला तीन हप्ताको तुलनामा ५५ प्रतिशत बढी देखिएको छ ।

यही तथ्याङ्ककै आधारमा यहाँका स्वास्थ्य अधिकारीले गत बुधबार नै दक्षिण कोरिया औपचारिक रूपमा नै कोरोना महामारीको चौथो चरणमा प्रवेश गरेको बताएका थिए । बुधबार मध्यराति अर्थात् २४ घन्टा यताको गणनामा देखिएका सङ्क्रमितमा करिब आधाजति त राजधानी सोलकै रहेका पाइएको छ । कोरिया सरकारले यहाँ कोरोना विरुद्धको खोपको अभियानलाई ब्यापक बनाइएको जनाएको छ ।

यहाँ अहिलेसम्म २ हजार ५० जनाको कोभिड सङ्क्रमणकै कारण ज्यान गएको छ । दक्षिण कोरियाका स्वास्थ्य अधिकारीका अनुसार यहाँको मृत्यु दर १.१८ प्रतिशत रहेको पाइएको छ । (रासस÷सिन्ह्वा)