बसन्त खड्का, अर्घाखाँची ।
अखिल नेपाल युवक संघले प्रतिनिधि सभा पुनर्स्थापनाको माग गर्दै सन्धिखर्कमा बृहत् मोटरसाइकल र्याली आयोजना गरेको छ ।प्रतिगमन, भ्रष्टाचार, बेथिती र संसद विघटनको बिरोधमा निकालिएको मोटरसाइकल र्यालिमा युवहरुको बाक्लो उपस्थिती देखिन्थ्यो ।
र्यालीपछि शान्ती बगैंचाको चोकमा सम्पन्न कोणसभामा बोल्दै अखिल नेपाल युवक संघका अध्यक्ष अनिलकिशोर घिमिरेले युवाहरूको श्रम र शक्ति विदेशमा बेचेर देशको प्रगती नहुने बताउनुभयो । उहाँले बर्तमान सरकारको चर्को आलोचना गर्दै देशलाई पछाडी धकेल्न सरकार सक्रिय रहेको आरोप पनि लगाउनुभयो ।
संसद विघटन गरेर प्रधानमन्त्री ओलीले देशलाई प्रतिगमन तर्फ धकेलेको भन्दै अध्यक्ष घिमिरेले अहिलेका नेकपाहरुले कम्युनिस्ट नाम र हँसिया हथौडा अङ्कित झण्डाको दुरुपयोग गरेको आरोप पनि लगाउनुभयो ।
यस्तै सभालाई सम्बोधन गर्दै राष्ट्रिय जनमोर्चाका जिल्ला अध्यक्ष थम्मन केसीले पनि सरकारका कदमहरुको चर्को आलोचना गर्नुभयो ।
मसाल बजारबाट निस्किएको मोटरसाइकल र्याली चुत्राबेसि, सन्धिखर्क, तारामार्ग, हटारिनेटा, टुडिखेललाइन, पाणिनी चोक, हललाइन हुँदै बगैंचामा आएर कोणसभामा परिणत भएको थियो ।
