काठमाडौँ । राष्ट्रिय जनमोर्चाले नागरिक समाजको आन्दोलनप्रति ऐक्यबद्धता जाहेर गरेको छ ।
गत माघ १२ गते नागरिक समाजको आन्दोलनमा भएको प्रहरी दमनको विरोध गर्दै राजमोले ऐक्यबद्धता जाहेर गरेको हो ।
राजमो उपाध्यक्ष तथा प्रवक्ता दुर्गा पौडेलको हस्ताक्षरमा २०७७ माघ १४ गते प्रसारित प्रेसवक्तव्यमा सो जानकारी दिइएको छ ।
नागरिक समाजका घाइते आन्दोलनकारीको निःशुल्क उपचारसमेतको माग गरिएको प्रेसवक्तव्यको पूर्ण पाठ यस्तो छ–
“संसद विघटनका विरुद्ध माघ १२ गते बालुवाटारमा भएको नागरिक आन्दोलनमा प्रहरीले लाठीचार्ज र पानीका फोहरा हानेर कडा दमन गरेको छ । आन्दोलनमा सहभागी केही व्यक्तिहरू घाइते भएका छन् । हामी शान्तिपूर्ण नागरिक आन्दोलनमा भएको प्रहरी दमनको विरोध र भत्र्सना गर्दछौँ । घाइतेहरूको निःशुल्क उपचारको माग गर्दछौँ । नागरिकको शान्तिपूर्ण विरोध गर्न पाउने अधिकारलाई नियन्त्रित गर्ने सरकारी क्रियाकलाप बन्द गर्न चेतावनी दिन चाहन्छौँ ।
प्रतिगमनका विरुद्धमा २०६३ सालमा भएको आन्दोलनमा नागरिक आन्दोलनको पनि योगदान रहेको छ । केपी शर्मा ओलीको संसद विघटनका विरुद्धमा धेरै राजनीतिक दलहरूले आन्दोलन गरिरहेका छन् । विगत केही समयदेखि नागरिक समाजको पनि आन्दोलन चलिरहेको छ । ओलीको असंवैधानिक कदमका विरुद्ध नागरिक आन्दोलनको ठुलो महत्त्व छ । नागरिक आन्दोलनप्रति हाम्रो पार्टी राष्ट्रिय जनमोर्चाले ऐक्यबद्धता प्रकट गर्दछ ।”
