पुष्कर भट्ट, महेन्द्रनगर ।
राष्ट्रिय जनमोर्चा कञ्चनपुरले माघ महिनाभर संघर्षका कार्यक्रम निश्चित गरेको छ । सोमबार भएको भेलाले ‘गणतन्त्र, राष्टियता र धर्मनिरपेक्ष रक्षा गरौं, संघीयता खारेज र भ्रष्टाचारको विरोध गरौं । विघटित संसद पुनर्स्थापना गर’ भन्ने नारासहित एकमहिने अभियानको घोषणा गरेको हो ।
कार्यक्रम अनुसार जिल्लाका सबै १० वटै स्थानीय तहमा सभा, कोणसभा, जनभेटघाट, अन्तरक्रिया, मसाल जुलुश, पर्चा वितरणसहित संगठन निर्माणको योजना बनाइएको छ । अभियानको उद्घाटन माघ ५ गते कृष्णपुर नगरपालिकामा गरिनेछ ।
यस्तै, ६ र ७ गते कृष्णपुर, ८ गते महाकाली नगरपालिका, ९, १० र ११ गते भीमदत्त नगरपालिका, ११ र १२ गते वेतकोट नगरपालिका, १३ र १४ गते शुक्लाफाँटा नगरपालिका, १५ गते लालझाडी र १६ गते पुनर्वासमा कार्यक्रमहरु हुनेछन् ।
यसैगरी, १७ देखि २० गतेसम्म बेलौरीमा विविध कार्यक्रम गरी २० गते सभाको आयोजना गरिनेछ । २१ र २२ गते बेल्डाँडीका कार्यक्रम तय गरिएको छ भने २५ गते पुनः महेन्द्रनगरमा विरोध सभाको आयोजना हुनेछ । २७ गते शुक्लाफाँटा नगरपालिकाको झलारी बजारमा मसाल जुलुससहित कार्यक्रमको समापन गरिने राजमो कञ्चनपुरले जनाएको छ ।
राजमो जिल्ला अध्यक्ष रामबहादुर कार्कीको अध्यक्षतामा भएको भेलामा राजमो केन्द्रीय सदस्य मनोज भट्टले समसामयिक विषयमा प्रशिक्षण दिनुभएको थियो भने केन्द्रीय सदस्य एवम् सुदूरपश्चिम प्रदेश अध्यक्ष नन्दराज भट्टले पार्टीले देशव्यापी रुपमा आयोजना गरिरहेको संघर्षका कार्यक्रमको महत्वबारे स्पष्ट पार्नुभएको थियो ।
कार्यक्रममा राजमो केन्द्रीय सदस्य लोकेन्द्र लम्साल, नेकपा (मसाल) का जिल्ला प्रवक्ता लक्ष्मीदत्त बडु, तराई मधेश जनवादी मोर्चाका महासचिव राजाराम चौधरी, समता समाजका महासचिव गोविन्द विक, रक्तिम सांस्कृतिक अभियानका जिल्ला संयोजक ललित चन्द, राजमो जिल्ला सहसचिव लालबहादुर कुँवर, अखिल (छैठौं) का जिल्ला सचिव पुष्कर भट्ट, राजमो नेता पदम साउद ,गोविन्द बोहरा, कमल साहु, बामपन्थी नेता जनक कुँवर, लगातका नेता कार्यकर्ता को सहभागिता रहेको थियो ।
राजमो जिल्ला सचिव अहिमान थापाले गरेका सञ्चालन गरेको कार्यक्रममा कार्यालय सचिव लालबहादुर कुँवरले स्वागत गर्नुभएको थियो भने रक्तिमका जिल्ला संयोजक ललित चन्दले जनवादी गीतमार्फत स्वागत गर्नुभएको थियो ।
