काठमाडौं । राष्ट्रिय सभा निर्वाचनको उम्मेदवारी छनौटको विषयले सत्तारुढ माओवादी केन्द्रमा किचलो भएको छ ।
उम्मेदवार छनौट गर्दा हुम्लालाई बेवास्ता गरेको भन्दै हुम्लाबाट प्रतिनिधित्व गर्ने माओवादी जनप्रतिनिधिहरुले मतदानमा सहभागी नहुने निर्णय गरेका छन् ।
यस्तै, उनीहरुले माओवादीको जिल्ला तहभन्दा माथिल्लो तहका कार्यक्रममा सहयोग नगर्ने पनि स्पष्ट पारेका छन् ।
आगामी माघ ११ गते हुने १९ सिटका लागि राष्ट्रिय सभा निर्वाचनमा हुम्लाका ८ जना जनप्रतिनिधिले भाग नलिने निर्णय गरेका हुन्। स्थानीय तहका माओवादी केन्द्रका ६ जना र दुई जना कर्णाली प्रदेशसभामा गरि ८ जना जनप्रतिनिधिले मतदान नगर्ने निर्णय गरेका माओवादी केन्द्रका केन्द्रीय सदस्य समेत रहेका सिमकोट गाउँपालिका अध्यक्ष विजय भण्डारीले जानकारी दिए ।
यसरी मतदान नगर्ने निर्णय गर्नेमा माओवादीबाट कर्णाली प्रदेश सभामा रणसिंह परियार, समानुपातिक सांसद जुम्कीत लामा, सिमकोट गाउँपालिका अध्यक्ष विजय भण्डारी, ताँजकोट गाउँपालिका अध्यक्ष लालकेश जैशी, नाम्खा गाउँपालिका अध्यक्ष प्रेम लामा, अदानचुली गाउँपालिका उपाध्यक्ष कर्ण रोकाया, खार्पुनाथ गाउँपालिका उपाध्यक्ष ज्ञानबहादुर सिंह र सर्केगाड गाउँपालिका उपाध्यक्ष चन्द्रसिंह कार्की रहेका छन्।
माओवादी केन्द्र हुम्लाले यसअघि राष्ट्रिय सभा निर्वाचनका लागि माओवादी जिल्ला समन्वय समितिका संयोजक डा. दिपेन्द्र रोकायालाई राष्ट्रिय सभाका लागि एकल नाम सिफारिस गरेको थियो। गठबन्धनमा भागबण्डा गर्दा निर्वाचन हुने कर्णालीतर्फका तीन सिट मध्ये माओवादीका भागमा एक सिट परेको छ। जसमा दलिततर्फ कालीकोटका विष्णु विश्वकर्माको नाम माओवादीले टुंगो लगाएको छ।
उनीहरूले पार्टीको तर्फबाट रुकुमपश्चिम, जाजरकोट र कालीकोटले मात्रै लाभ लिएको, पार्टी नेतृत्वले हुम्लालाई सधैं बेवास्ता गरेको भन्दै असन्तुष्टि जनाएका छन्।
गठबन्धनबाट ६ सिट पाएको माओवादीले चम्पा कार्की, श्रीकृष्ण अधिकारी, मनरुपा शर्मा, झक्कु सुवेदी, विष्णु विक र रेणु चन्दलाई उम्मेदवार बनाएको छ ।
