लक्ष्मण बेल्बासे ##

फूल फुलेर त बास्ना पनि आउँछ
जून शीतल बनेर त उज्यालो छाउँछ
जूनसँगै खेल्नेले दाग पनि भेटाउँछ
भँमरा बाठो खेल्दाखेल्दै भोक मेटाउँछ

फूल फुल्छ भमरा डुल्छ आआफ्नै लागि
सबैका आफ्नै स्वार्थ यहाँ बाँच्नका लागि
फूल फुल्छ सेचन गर्न भमरा डुल्छ पेट भर्न
स्वार्थ मिलेर त सृष्टिले पाएको छैन मर्न

भमरा मर्छ यहाँ फर्किने समय भुलेर
डुब्छ मान्छे यहाँ तैरिन भुलेर
मर्ने मर्छन् यहाँ दोष अरूलाई थोपरेर
बदला लिएँ भन्छन् आफैलाई कोपरेर

फूल चाउरिन्छ खोला ताल पर्छ ठाउँमा
डुब्नु दोष तिम्रो रिस गर्छौं अरुकै नाउँमा
जन्मनु कसैको रोजाइ हैन यही माटोमा
सङ्घर्ष त गर्नैपर्छ जन्मिन पनि बाटोमा

जन्मनु र मर्नु माझको हो जीवन
फूल झर्छ मुना पलाउँदा सकिन्छ जन
दोष लाउन छोड मनको झार गोड
मर्नु जित हैन जिउनका लागि लड