गुल्मी, साउन ९ । गुल्मीको कालीगण्डकी गाउँपालिका–४ पनौटास्थित कालीगण्डकी नदीको बगरमा एक महिलाको शव फेला परेको छ।
प्रहरीका अनुसार शनिबार दिउँसो करिब ३:२० बजे स्थानीयवासीले नदीले बगाएर ल्याएको जस्तो देखिने अवस्थामा एक महिलाको शव बगरमा देखेपछि प्रहरीलाई खबर गरेका थिए। सूचना प्राप्त हुनासाथ प्रहरी टोली घटनास्थलमा पुगेको थियो।
प्रारम्भिक रूपमा करिब ३५–४० वर्षीया अज्ञात महिलाको शव रहेको अनुमान गरिए पनि अनुसन्धानका क्रममा उक्त शव बागलुङको जैमिनी नगरपालिका–७, डौवाफाँट निवासी करिब ४५ वर्षीया शकुन्तला शर्माको रहेको पुष्टि भएको प्रहरीले जनाएको छ।
स्थानीयवासी प्रकाश चालिसेलगायतले शवको पहिचान गरेका हुन्। घटनाबारे मृतकका आफन्तलाई समेत जानकारी गराइसकिएको प्रहरीले जनाएको छ।
प्रहरीका अनुसार शकुन्तला साउन ९ गते बिहान करिब ४ बजेदेखि परिवारको सम्पर्कमा नरहेकी थिइन्। उनी मानसिक स्वास्थ्यसम्बन्धी औषधि सेवन गर्दै आएको प्रारम्भिक अनुसन्धानबाट खुलेको प्रहरीले जनाएको छ।
घटनाको कारण खुल्न बाँकी रहेको र यस सम्बन्धमा थप अनुसन्धान भइरहेको प्रहरीले जनाएको छ।
