काठमाडौँ । क्रिकेटर सन्दीप लामिछानेलाई अदालतले बलात्कारको मुद्दामा दोषी ठहर गरेको छ । उनलाई सजाय भने पुस २५ गते मात्र सुनाइने छ ।
जिल्ला अदालत काठमाडौँका न्यायाधीश शिशिरराज ढकालको इजलासले २०८० पुस १३ गते शुक्रबार सो फैसला दिएको हो ।
घटना भएको भनिएको दिन सन्दीप र पीडित गौशाला २६ नगरकोट गई होटल काठमाडौँ इनको एउटै कोठामा बसेको विषयमा कुनै विवाद नभएको ठहर अदालतको छ ।
एउटै कोठामा बसेको बेला सन्दीपले आफूलाई बलात्कार गरेको गौशाला २६ को दाबी रहेको भन्दै अदालतले भनेको छ– ‘गौशाला २६ तथा प्रतिवादी सन्दीप लामिछानेको घटना हुँदाको दिनको क्रियाकलापको समेत घटनाक्रमसमेतलाई विचार गर्दा करणी भएको देखियो ।’
त्यस्तै, रालुका गाविस नुवाकोट तथा शङ्करापुर नगरपालिका, काठमाडौंको बसाइँसराइ दर्ताकिताब र नारायणी उपक्षेत्रीय अस्पताल, वीरगञ्जको डेलिभरी रजिस्टर, गौशाला २६ को बकपत्रलगायतले गौशाला २६ को जन्ममिति १८ असार २०६१ भएको र घटना भएको बेला उनको उमेर १८ वर्ष पुगेको इजलासको ठहर छ ।
गौशाला २६ को नाजुक आर्थिक अवस्थाको फाइदा उठाएर करणी गरेकाले सहमतिमा नभएको भन्दै अदालतले भनेको छ– ‘सन्दीप लामिछानेले मुलुकी अपराध संहिता–२०७४ को दफा २१९ (१), (२) र (३) (ङ) बमोजिम कसुर गरेको ठहर्दछ ।’
तीन वर्षभन्दा बढी कैदसजाय हुने मुद्दामा कसुर निर्धारणका लागि छुट्टै सुनुवाइ गर्नुपर्ने भएकाले उनलाई कति वर्ष कैदसजाय हुने भन्ने तोकिएको छैन ।
न्यायाधीश ढकालको इजलासमै पुस २५ गते हुने सुनुवाइले लामिछानेमाथिको कैद, जरिवाना र क्षतिपूर्ति निर्धारण गर्नेछ ।
लामिछाने विरुद्ध २०७९ भदौ २१ उजुरी परेको थियो । उजुरीमा सन्दीपले ५ भदौमा बानेश्वरबाट नगरकोट लगेको र राति फर्केर पिङ्गलास्थानस्थित होटल काठमाडौँ इनमा लगेर बलात्कार गरेको भनिएको थियो ।
