बुटवल। राष्ट्रिय जनमोर्चा रुपन्देहीले आगमी वैशाख ३० गते हुने स्थानीय तहको निर्वाचनका लागि प्रतिवद्धता पत्र सार्वजनिक गरेको छ । चुनावी घोषणा पत्रको रुपमा राष्ट्रिय जनमोर्चाले आइतबार बुटवलमा पत्रकार सम्मेलन गरी ३१ बुँदे चुनावी प्रतिवद्धता पत्र सार्वजनिक गरेको हो ।
राष्ट्रिय जनमोर्चा रुपन्देहीका अध्यक्ष बद्रे आलमले चुनावी प्रतिवद्धता पत्र सार्वजनिक गर्नुभएको हो । पत्रकार सम्मेलनमार्फत सार्वजनिक गरिएको उक्त प्रतिवद्धता पत्रमा गणतत्रन्त्र, राष्ट्रियताको रक्षा, संघीयता र एमसीसी खारेजीका लागि राष्ट्रिय जनमोर्चाले रुपन्देहीका स्थानीय तहहरुमा उम्मेदवारी दिएको उल्लेख गरिएको छ ।
स्थानीय स्वशासनलाई संविधानमै मौलिक हकका रुपमा स्थापित गर्न र प्रदेश संरचनाको खारेजी गरी प्रदेशको अधिकार स्थानीय तहमा हस्तान्तरण गराउन स्थानीय तहको चुनावमा भाग लिएको प्रतिवद्धता पत्रमा उल्लेख छ ।
त्यस्तै संविधानमा उल्लेखखित जनताको मौलिक हक अधिकार व्यवहारमा लागू गर्न, स्वास्थ्य संस्थाहरुको स्तरउन्नती गरी निःशुल्क स्वास्थ्य उपचारको व्यवस्था गर्न, गाउँ, नगरको विकासका साथै सर्वाङगिण विकासका लागि विकेन्द्रित र सन्तुलित विकासको नीति लागू गरिने राष्ट्रिय जनमोर्चाले बताएको छ ।
फोहोरको उचित व्यवस्थापन, शुद्व खानेपानीको पहुँच जनतामा पुर्याउने, नदीजन्य पदार्थको जथाभावी उत्खनन् नियन्त्रण गरिने, विद्युत तथा इन्धन आपूर्ति, अपराध नियन्त्रण र ट्राफिक नियमको उचित व्यवस्थापन गरिने उल्लेख छ ।
स्थानीय तहसम्म मौलाउँदै गएको भ्रष्टाचार, महंगी, लागुऔषधको नियन्त्रण, हत्या, हिंंसा, बलात्कार, छुवाछुत, कुप्रथाको अन्त्य र जेष्ठ नागरिकको संरक्षण, उचित स्वास्थ्य सेवाको व्यवस्था व्यवस्था गरिने राष्ट्रिय जनमोर्चाको चुनावी प्रतिवद्वता पत्रमा उल्लेख गरिएको छ ।
विकासका नाममा हुने अनियमितता रोक्न, भूमिहीन र अव्यवस्थित बसोवासको समस्यालाई सधैँका लागि अन्त्य गरी जग्गाधनी पूर्जा वितरण गरिने प्रतिवद्धता जनाइएको छ ।
त्यस्तै जीवन उपयोगी निःशुल्क शिक्षाको व्यवस्था गरिने र कृषि, पर्यटनको उचित विकास गरी सहकारी मार्फत कृषि उत्पादन, साना उद्योगहरुलाई प्रोत्सान गर्ने र विदेशी आयतलाई प्रतिस्थापन गरी स्थानीय सरकारको आर्थिक विकास गरिने छ ।
जनताबाट निर्वाचित प्रतिनिधिले जनताको हित विपरित कार्य गरेमा फिर्ता बोलाउन पाउने पाउने अधिकार सुनिश्चित गरिने राष्ट्रिय जनमोर्चा रुपन्देहीका उम्मेदवाहरुले प्रतिवद्वता जनाएका छन् ।
पाँच दलीय गठबन्धनमा सामेल राष्ट्रिय जनमोर्चाले रुपन्देहीका विभिन्न स्थानीय तहमा ७८ जना जनप्रतिनिधि उम्मेदवार बनेका छन्।
बद्रे आलमको अध्यक्षता र गंगालाल सापकोटाको सञ्चालनमा पत्रकार सम्मेलन भएको थियो ।
बुटवल उपमहानगरपालिकामा राष्ट्रिय जनमोर्चाको तर्फबाट कृष्ण प्रसाद पोखरेलले प्रमुख र रेनु कुमारी क्षेत्रीले उपप्रमुखमा उम्मेदवारी दिनुभएको छ ।
- बुटवल उपमहानगरमा राजमोबाट प्रमुखमा पोखरेल र उपप्रमुखमा क्षेत्री
- सिद्धार्थनगरमा राजमोको तर्फबाट प्रमुखमा धामी, उपप्रमुखमा शर्मा
