काठमाडौं । निर्वाचन आयोगले अब स्थानीय निर्वाचनमा सहभागी हुने सबै दललाई आफ्नो निर्वाचन चिन्ह दिने भएको छ । आयोगको बुधबार बसेको बैठकले राष्ट्रिय दलको मान्यता नपाएका दलहरुलाई सशर्त दलीय चुनाव चिह्न दिने निर्णय गरेको हो ।
यसअघि आयोगले राष्ट्रिय मान्यता प्राप्त दललाई मात्र आफ्नो चिन्ह दिने बताउँदै आएको थियो । त्यसको चौतर्फी विरोध भएपछि आयोगले निर्वाचनमा सहभागी हुने दललाई केही सर्त राखेर चिन्ह दिने निर्णय गरेको जनाएको छ ।
आयोगको निर्णय अनुसार अब राष्ट्रिय मान्यता नपाएका दलहरुले कुन–कुन जिल्लामा जिल्ला स्तरको संगठनात्मक संरचना छ भन्ने विवरण केन्द्रीय पदाधिकारीबाट प्रमाणित गरी ६ चैतभित्र आयोगलाई बुझाउनुपर्छ ।
जिल्ला निर्वाचन कार्यालयले चेकजाँच गर्दा विवरण मिलेमा विवरण बुझाउने दलहरुको चुनाव चिह्न राखेर मतपत्र छापिने छ र उम्मेदवारी दर्तापछि सम्बन्धित दलकै चुनाव चिह्न दिइने छ ।
आयोगले मागेको विवरणहरु नबुझाउने दलका उम्मेदवारलाई भने स्वतन्त्र उम्मेदवारलाई प्रदान गरिने चुनाव चिह्न नै प्रदान गरिने आयोगले जनाएको छ ।
स्थानीय तह निर्वाचन ऐनको दफा २६ मा राष्ट्रिय मान्यता प्राप्त दललाई मात्र दलीय चुनाव चिह्न दिने व्यवस्था छ । राजनीतिक दलसम्बन्धी ऐनको दफा ५२ मा प्रतिनिधिसभामा समानुपातिकतर्फ ३ प्रतिशत र प्रत्यक्षतर्फ कम्तीमा एक सिट जित्ने दललाई मात्र राष्ट्रिय दलको मान्यता दिने व्यवस्था छ ।
तर साना दलहरुले आफ्नै चुनाव चिह्न पाउनुपर्ने माग गरेपछि आयोगले केही शर्त अघि सारेको छ ।
- यो पनिः
- अध्यक्ष केसीसहित राजमो नेताहरूद्वारा प्रमुख निर्वाचन आयुक्तसँग भेटवार्ता
- सर्वदलीय बैठकमा दुर्गा पौडेलको प्रश्न : लोकतन्त्रमा दलमाथि अंकुश किन ?
