काठमाडौँ । नेकपा (मसाल) ले भारत त्रिपुराका मुख्यमन्त्री विप्लब देवले नेपाल र श्रीलङ्कामा भारतीय जनता पार्टीको सरकार विस्तार गर्ने भनी दिएको अभिव्यक्तिबारे आफ्नो स्थिति स्पष्ट पार्न भारतको केन्द्र सरकारसित माग गरेको छ ।
पार्टीका प्रवक्ता रामप्रकाश पुरीको हस्ताक्षरमा २०७७ फागुन ६ गते जारी प्रेसवक्तव्यमार्फत पार्टीले यस्तो माग अघि सारेको हो ।
भारतका पूर्व गृहमन्त्री वल्लबभाइ पटेलदेखि आयङ्गरसम्मका अभिव्यक्ति त्यही प्रकारको भएको उल्लेख गर्दै पार्टीले वक्तव्यमा विप्लब देवको अभिव्यक्तिप्रति घोर विरोध तथा भत्र्सना गरेको छ ।
प्रेसवक्तव्यको पूर्ण पाठ यस्तो छ–
“भारतीय साम्राज्यवादको प्रवृत्तिको प्रतिबिम्बित हुने गरी भारतको त्रिपुरा राज्यका मुख्यमन्त्री विप्लव देवले भारतका वर्तमान गृहमन्त्री अमित साहले ‘नेपाल र श्रीलङ्कामा समेत भाजपाको सरकार विस्तार गर्ने योजना रहेको’ भनी आफूलाई बताएको कुरा हालै एउटा कार्यक्रममार्फत सार्वजनिक अभिव्यक्तिप्रति नेकपा (मसाल) को गम्भीर ध्यान आकर्षण भएको छ । त्यो अभिव्यक्तिको घोर विरोध तथा भ्रत्र्सना गर्दै यो प्रेसवक्तव्य जारी गरिएको छ ।
उनको यो अभिव्यक्तिले गम्भीर प्रश्न खडा गरेको छ । सर्वप्रथम यो अभिव्यक्ति एउटा राज्यको मुख्यमन्त्रीको मात्र नभएर भारतको केन्द्रीय सरकारका गृहमन्त्रीले नै नेपाल र श्रीलङ्कामा भाजपाको सरकार विस्तार गर्ने बताएको कारणले यो कुरा भारतको केन्द्रीय सरकारसँग जोडिन आउँछ । तसर्थ यसबारेमा भारतको केन्द्रीय सरकारले नै आफ्नो स्थिति स्पष्ट पार्नुपर्दछ । नेपाललाई भारतमा गाभ्न वा विलय गर्न अमित साह वा विप्लब देवको मात्रै योजना नभएर विगतमा बल्लभभाइ पटेलदेखि आयङ्गरसम्मले यस प्रकारको योजना सार्वजनिक गर्दै आएका छन् । त्यसको पछिल्लो कडीको रूपमा साहको योजनालाई विप्लव देवले सार्वजनिक गरेका छन् ।
नेपालका विरुद्ध उनले दिएको विवादास्पद अभिव्यक्तिबाट भारतको साम्राज्यवादी चरित्र नाङ्गो रूपमा अगाडि आएको छ । भारतीय साम्राज्यवादले नेपालको सार्वभौमिकता, राष्ट्रियता र स्वतन्त्रतामाथि बारम्बार प्रहार गर्दै आएको छ । त्यसको हामीले दृढतापूर्वक विरोध र भ्रत्र्सना गर्दछौँ ।”
