दुबई,२ चैत । जर्मनीका विदेशमन्त्री योहान वाडेफुलले आइतबार होर्मुज क्षेत्रमा युरोपेली सङ्घको नौसैनिक अभियान ‘आस्पिदेस’ विस्तार गर्ने विषयमा शङ्का व्यक्त गर्नुभएको छ ।
जर्मन सार्वजनिक प्रसारण संस्थासँगको अन्तर्वार्तामा उहाँले उक्त अभियानले क्षेत्रमा थप सुरक्षा सुनिश्चित गर्न सक्छ कि सक्दैन भन्ने विषयमा आफू ‘अत्यन्त शंकित’ रहेको बताउनुभयो । उहाँका अनुसार लाल सागर क्षेत्रमा तैनाथ गरिएको उक्त अभियानले अपेक्षित प्रभावकारिता देखाउन नसकेको पनि उल्लेख गर्नुभयो ।
वाडेफुलले क्षेत्रीय सुरक्षा सुनिश्चित गर्न सैन्य द्वन्द्वलाई ‘मूल रूपमा समाधान’ गर्नु आवश्यक रहेको धारणा राख्नुभयो । युरोपले सधैं समुद्री मार्गहरूको सुरक्षाका लागि रचनात्मक सहयोग प्रदान गर्दै आएको उल्लेख गर्दै उहाँले तत्काल यस्तो आवश्यकता देखिएको छैन र जर्मनीले यसमा सहभागिता जनाउनुपर्ने स्पष्ट आधार पनि हालसम्म नदेखिएको बताउनुभयो ।
उहाँले भन्नुभयो, “हामी अमेरिका र इजरायलसँग अनुरोध गर्दछौं कि उनीहरूले हालसम्म कुन ठोस उद्देश्यहरू अघि बढाइरहेका छन् भन्नेबारे जानकारी गराउनुहोस् र यो युद्ध कसरी अन्त्य गर्न सकिन्छ भन्ने विषयमा हामीसँग छलफल गरियोस् ।”
गत फेब्रुअरी २८ मा इजरायल र अमेरिकाले तेहरानसहित इरानका विभिन्न शहरहरूमा संयुक्त आक्रमण गरेका थिए । उक्त आक्रमणमा इरानका सर्वोच्च नेता अली खामेनी, वरिष्ठ सैन्य कमाण्डर तथा एक हजार तीन सयभन्दा बढी सर्वसाधारणको मृत्यु भएको बताइएको छ ।
त्यसपछि इरानले मध्यपूर्व क्षेत्रमा रहेका इजरायल तथा अमेरिकी सैन्य आधारहरू र सम्पत्तिलाई लक्षित गर्दै क्षेप्यास्त्र र मानवरहित विमानमार्फत आक्रमणको श्रृङ्खला सञ्चालन गरेको जनाएको छ ।
आक्रमण तेस्रो हप्तामा प्रवेश गरिरहँदा र विश्वको करिब पाँचौं भाग तेल आपूर्ति हुने होर्मुज क्षेत्र प्रभावकारी रूपमा बन्द भएपछि विश्व ऊर्जा बजार तथा आर्थिक गतिविधिमा गम्भीर प्रभाव पर्न थालेको बताइएको छ ।
