काठमाडौँ । आज विहिबार मङ्सिर ११ गते अन्तर्राष्ट्रिय महिला सेमिनारको उद्घाटन कार्यक्रम सम्पन्न गरिएको छ । तीन दिनसम्म चल्ने उक्त सेमिनारमा विश्वका विभिन्न देशहरूबाट प्रतिनिधित्व भइरहेको छ ।
कार्यक्रमको उद्घाटन विभिन्न महादेशका को–अर्डिनेटरहरूले संयुक्तरुपमा दीप प्रज्वलित गरी उद्घाटन गरिएको हो । उद्घाटन एशिया को–अर्डिनेटर दुर्गा पौडेल, अफ्रिका को–अर्डिनेटर मालि पोला, ल्याटिन अमेरिका को–अर्डिनेटर एरिक लुसा, युरोप को–अर्डिनेटरहरू नताली, करोला क्युरिन, सुसिवारा, मिडिल इस्ट को–अर्डिनेटर डिलार्जले संयुक्त रुपमा भएको थियो ।
उद्घाटन कार्यक्रम विहान ठिक १० बजेदेखि शुरुभई दिउसो १२ बजेसम्म चल्यो । करिब चारसय जना महिला प्रतिनिधीहरूका बीचमा उद्घाटन गरिएको उक्त कार्यक्रम बुढानीलकण्ठ नगरपालिका–१० स्थित सुकुन्डा वेङ्केट हलमा सम्पन्न भएको हो ।
उद्घाटन समारोहमा अखिल नेपाल महिला संघकी अध्यक्ष मिना पुन, क्रान्तिकारी महिला संघबाट अम्बिका मुखरी, अखिल नेपाल महिला क्रान्तिकारीबाट दामा शर्मा, बन्धु चन्द, समाजवादी महिला संघबाट कमला विश्वकर्मा, वैज्ञानिक समाजवादी महिला संघबाट राजेश्वरी लगायतले शुभकामना मन्तव्य दिनुभएको थियो ।
त्यस्तै युरोप को–अर्डिनेटर नतालियाले लिखित शुभकामना मन्तव्य प्रस्तुत गर्नुभएको थियो । ‘साम्राज्यवादले विश्वभरीका गरिखाने वर्गमाथि शोषण गरेको छ’ नतालियाले भनिन्– ‘यो सेमिनारले महिला अधिकार, शान्ति, स्वच्छता, ऐक्यवद्धता जनाउँदै हामी मानव जातिको शान्ति हितको भविष्य स्थापनाको लागि पहल गर्नेछ ।’
नेपाल कम्युनिस्ट पार्टी (मसाल) का महामन्त्री मोहनविक्रम सिंह, नेपाली कम्युनिस्ट पार्टीका संयोजक पुष्पकमल दाहाल, नेपाल कम्युनिस्ट पार्टी (माओवादी) काम महासचिव नेत्रविक्रम चन्द, क्रान्तिकारी कम्युनिस्ट पार्टीका महासचिव सिपी गजुरेल, जर्मन कम्युनिस्ट पार्टी (एमएलपिडी)ले अन्तर्राष्ट्रिय सेमिनारलाई लिखित शुभकामना पठाएका थिए ।
त्यस्तै अफ्गानिस्थान कम्युनिस्ट पार्टी महिला समितिले भिडीयो सन्देश पठाएको थियो । भिडीयो सन्देशमा अफ्गानिस्थानमा महिलाहरूमाथि भइरहेको विभिन्न अन्याय अत्याचारका विषयलाई पनि सम्पन्न हुन लागिरहेको अन्तर्राष्ट्रिय सेमिनाले विश्वसामु उजागार गर्ने विश्वास व्यक्त गरिएको थियो ।
दिउसो एक बजेदेखि आयोजकका अनुसार सेमिनारमा देशविदेशबाट आउने प्रतिनिधिहरूले महिला अधिकार, साम्राज्यवाद, पर्यावरणलगायतका विभिन्न विषयमा छलफल गरिने छ ।
कार्यक्रम आज मंसिर ११ गतेदेखि १३ गते तीन दिनसम्म चल्ने छ ।
