काठमाडौँ । आज विहिबार मङ्सिर ११ गते अन्तर्राष्ट्रिय महिला सेमिनारको उद्घाटन कार्यक्रम हुने एसिया कोअर्डिनेटर दुर्गा पौडेलले जानकारी दिनुभएको छ । पौडेलका अनुसार विहान ठिक १० बजेदेखि अप्रान्ह १२ बजेसम्म सेमिनारको उद्घाटन कार्यक्रम रहेको छ ।
पौडेलका अनुसार कार्यक्रम बुढानीलकण्ठ नगरपालिका–१० स्थित सुकुन्डा वेङ्केट हलमा हुनेछ । देशविदेशबाट गरी करिब चार सय महिला प्रतिनिधि उपस्थिती भइसकेका छन् । दिउसो १२ बजेपछि पूर्व निश्चित कार्यक्रम अनुसार क्रमशः अन्तर्क्रिया कार्यक्रमहरू सञ्चालन गरिने छ ।
हिंजो बुधबार मंसिर १० गते कोअर्डिनेशन कमिटीको बैठक बसी विभिन्न विषयमा छलफल चलेको थियो । कार्यक्रम कसरी अनुशासित, सुरक्षित र मर्यादित रुपमा सम्पन्न पार्न सकिन्छ भन्ने विषयमा नै आयोजकहरू केन्द्रित रहेका थिए । त्यस्तै सेमिनारलाई कसरी प्रभावकारी बनाउने भन्नेबारे व्यापक छलफल भएको थियो ।
देशविदेशबाट आउने प्रतिनिधिलाई सुरक्षाको प्रत्याभूति गराउन प्रधानमन्त्री, गृहमन्त्री र सुरक्षा निकायसँग भेट गरी कोअर्डिनेटर दुर्गा पौडेलले युगदर्शनलाई जानकारी दिनुभयो ।
आयोजकका आनुसार सेमिनारमा देशविदेशबाट आउने प्रतिनिधिले महिला अधिकार, साम्राज्यवाद, पर्यावरणलगायतका विभिन्न विषयमा छलफल गरिने छ ।
कार्यक्रममा नेकपा (मसाल), क्रान्तिकारी कम्युनिस्ट पार्टी नेपाल, नेपाल कम्युनिस्ट पार्टी (माओवादी), नेपाली कम्युनिस्ट पार्टीसम्बद्ध महिला संगठन लगायत अन्य वामपन्थी पार्टी निकटका महिला संगठनबाट प्रतिनिधित्व रहने बताइएको छ ।
कार्यक्रम आज मंसिर ११ गतेदेखि १३ गते तीन दिनसम्म चल्ने छ ।
