चन्द्रा श्रीस, काठमाडौँ ।
आगामी मङ्सिर ११ देखि १३ गतेसम्म काठमाडौँमा सम्पन्न हुन थालिरहेको अन्तर्राष्ट्रिय महिला गोष्ठीको पूर्वसन्ध्यामा पत्रकार सम्मेलन सम्पन्न गरिएको छ ।
सम्मेलनको बारेमा जानकारी दिन २०८२ मङ्सिर ८ गते सोमबार रिपोर्टस् क्लबमा सो कार्यक्रम सम्पन्न भएएको हो ।
कार्यक्रममा महिला सम्मेलनका एजेन्डाबारे जानकारी दिँदै एसिया कोअर्डिनेटर दुर्गा पौडेलले विश्व महिला आन्दोलनले कठोर सङ्घर्षबाट प्राप्त गरेका उपलब्धि गुम्न थालेकाले त्यसको रक्षाका लागि यो सम्मेलन गर्न थालेको बताउनुभयो ।
उहाँले अन्तर्राष्ट्रिय महिला आन्दोलन कसरी अजेय सामाजिक शक्ति बन्न सक्छ भन्नै सैद्धान्तिक विषयमा अहिले गोष्ठी गर्न थालिएको बताउनुभयो ।
कार्यक्रममा चार महादेशका २० भन्दा बढी देशमा महिला प्रतिनिधिको सहभागिता हुने पनि उहाँले जानकारी दिनुभयो ।
पौडेलकै अध्यक्षता तथा अखिल नेपाल महिला सङ्घ (क्रान्तिकारी) की आङदावा शेर्पाको सञ्चालनमा अघि बढेको उक्त कार्यक्रममा युरोपियन कोअर्डिनेटर सुजे र क्यारोला, ल्याटिन अमेरिकी कोअर्डिनेटर एडी र फ्रान्सकी कोअर्डिनेटर नथलीको आतिथ्य रहेको थियो ।
एवम् प्रकारले कार्यक्रममा अखिल नेपाल महिला सङ्घकी अध्यक्ष मीना पुन, क्रान्तिकारी महिला सङ्गठनकी शारदा महत, अखिल नेपाल महिला सङ्घ क्रान्तिकारीकी अध्यक्ष बन्धु चन्द, समाजवादी महिला सङ्गठनकी कमला विक र अखिल नेपाल महिला सङ्घ (क्रान्तिकारी) की विमला दाहालको पनि आतिथ्य रहेको थियो ।
सम्मेलनमा जानकारी गराइएअनुसार तीनदिने गोष्ठी बुढानीलकण्ठस्थित सुकुन्डा पार्टी प्यालेसमा हुनेछ । पहिलो दिन उद्घाटनसँगै तीन दिनसम्म विभिन्न कार्यपत्र प्रस्तुत भई त्यसमाथि ग्रुप छलफल हुने आयोजकले जानकारी दिएको छ ।
