काठमाडौँ । नेपाल कम्युनिस्ट पार्टी (बहुमत)ले काठमाडौँमा जारी आइकोरको दोस्रो अन्तर्राष्ट्रिय महिला सम्मेलनलाई शुभकामना व्यक्त गरेको छ । पार्टीमा महासचिव धमेन्द्र वास्तोला (कञ्चन)ले हिंजो २०८२ मंसिर ११ गते सम्मेलनलाई लिखित शुभकामना पत्र पठाएका थिए ।

संसारभरीका महिलाहरूले प्राप्त गरेका राजनीतिक, आर्थिक, सामाजिक र पर्यावरणीय उपलब्धीहरूको रक्षा गर्दै थप उपलब्धी सहित समग्र मानव मुक्तिका सवालमा समेत यो सम्मेलन कोसेढुंगा सावित हुने शुभकामना पत्रमा उल्लेख गरेका छ ।

प्रस्तुत छ, धमेन्द्र वास्तोलाको शुभकामना पत्र :

‘International Coordination of Revolutionary Parties and Organizations (ICOR) को दोस्रो अन्तर्राष्ट्रिय महिला सम्मेलन नेपालमा हुन गइरहेको खबरले हाम्रो पार्टी लगाएत लाखौं नेपाली महिलाहरूलाई अत्यन्तै खुशी बनाएको छ । सर्वप्रथम महिलाहरूको राजनैतिक, आर्थिक, सामाजिक अधिकार सहित समग्र मुक्ति संघर्षमा आफ्‌नो जीवन बलिदान गर्ने संसारभरीका सम्पूर्ण विरंगनाहरूप्रति भावपूर्ण श्रदाञ्जली व्यक्त गर्दछ साथै घाईते अवस्थामा भएकाहरूको पूर्ण स्वास्थ्यलाभको कामना गर्दछ । साथै विभिन्न देशहरूबाट यो सम्मेलनमा सहभागी हुन आउनु भएका सम्पूर्ण समाजवादी एवम् क्रान्तिकारी महिलाहरूको प्रतिनिधित्व वा नेतृत्वको रुपमा उपस्थित तपाईहरू सबैलाई हाम्रो पार्टी हार्दिक स्वागत गर्दछ ।

आज संसारभरका महिलाहरू मुलतः पितृसत्तात्मक, साँस्कृक्तिक एवम् आर्थिक पहाडरुपी समस्याबाट प्रताडित छन् । साम्रज्यवादले महिला विरुद्ध विश्वव्यापी बेचबिखन र हत्या, असुरक्षित प्रवासन/आप्रवासन, प्राकृक्तिक स्रोत साधन माथि लुट, युद्ध निर्यात थोपर्ने कार्य र पर्यावरण बिनास गर्दै आइरहेको छ । साम्राज्यवादले पैदा गरेका समस्याहरू र महिलामाथि परम्परादेखि चल्दै आएका पहाडको समाधान नेकपा (बहुमत) ले बहसमा अघि सारेको आर्थिक नीतिले समाधान दिनेछ । यो विषय पनि यो सम्मेलनमा ध्यान दिइयोस् भन्ने हाम्रो पार्टीको अपेक्षा रहेको छ । तसर्थ उत्पादनका साधनहरूप्रति जन्मसिद्ध अधिकार सुनिश्चित गरी पैत्रिक सम्पत्तिको बिलोपीकरण गरी निजी सम्पत्तिको अन्त्य हुने हाम्रो पार्टी नेपाल कम्युनिष्ट पार्टी बहुमतको आर्थिक लाइनबारे यो सम्मेलनमा आवश्यक छलफल बहस होस् ।

संसारभरीका महिलाहरूले प्राप्त गरेका राजनीतिक, आर्थिक, सामाजिक र पर्यावरणीय उपलब्धीहरूको रक्षा गर्दै थप उपलब्धी सहित समग्र मानव मुक्तिका सवालमा समेत यो सम्मेलन कोसेढुंगा सावित हुने गरी सम्पन्न हुनेछ भन्ने आशा सहित हाम्रो पार्टी, नेपाल कम्युनिष्ट पार्टी (बहुमत) यो (ICOR) को दोस्रो अन्तर्राष्ट्रिय महिला सम्मेलनको भव्य सफलताको शुभकामना व्यक्त गर्दछ ।

आज विश्वमा जे जति संकटहरू पैदा भएका छन् त्यसको मुल कारण भनेको पुँजीवाद र साम्राज्यवाद नै हो। यसको आर्थिक, राजनीतिक र सामाजिक नीतिहरूका कारण विश्वमा महिलाहरूमाथि विभिन्न रुपका उत्पिडनहरू हुने गरेका छन् । यसले संसारभर अनावश्यक युद्ध थोपर्ने, महिलाहरूमाथि हत्या हिंसा गर्ने, असुरक्षित आप्रवासन र पर्यावरणीय विध्वंश गरी प्राकृक्तिक स्रोत साधनहरूमाथि लुटपाट गरिरहेको छ । यसका विरुद्ध पनि यो सम्मेलनले उचित संश्लेषण गरोस् ।

यी सबै खाले उत्पिडनको जंजीर तोड्न समाजबादी आन्दोलनको आवश्यक्ता छ । समाजवाद हुँदै साम्यवादसम्म पुग्ने राष्ट्रिय तथा आन्तर्राष्ट्रिय आन्दोलनले मात्र पर्यावरणीय बिनास, महिलाहरूमाथि हुने हिंसा, महिला स्वतन्त्रता र समानताको मुद्दाहरू समाधान गर्न सक्छ । आशा छ यो (ICOR) को दोस्रो अन्तर्राष्ट्रिय महिला सम्मेलनले विश्वव्यापी समाजवादी आन्दोलनको जगमा महिलाका राष्ट्रिय र अन्तर्राष्ट्रिय मुद्दाहरू सहित समग्र मानव मुक्तिको राजनितीक कोर्षलाई आवश्यक पर्ने संघर्षको खाका कोर्न सफल होस् । हार्दिक शुभकामना

क्रान्तिकारी अभिवादन सहित !’

११ मंसिर, २०८२ (२७ नोवेम्बर, २०२५)

कन्चन

महासचिव