काठमाडौँ । अखिल (छैठौं) बागमती प्रदेशको भेला १९ सदस्यीय प्रदेश समिति गठन गर्दै सम्पन्न भएको छ ।
केन्द्रीय अध्यक्ष सुवास जिसीको प्रमुख आतिथ्यमा २०८२ भदौ १४ गते शनिबार बागबजारस्थित ल क्याम्पसमा सो भेला सम्पन्न भएको हो ।
भेलालाई सम्बोधन गर्दै अध्यक्ष जिसीले प्रस्तावित शिक्षा विधेयक अत्यन्त पश्चगामी, विद्यार्थी विरोधी र शैक्षिक निजीकरणलाई संस्थागत गर्ने गर्ने गरी आएको धारणा राख्नुभयो ।
‘यसले युवा पिँढीमा चरम निराशा ल्याउने छ । विदेश पलायन बढाउनेछ र सार्वजनिक शिक्षालाई तहसनहस गराउने षड्यन्त्रका साथ आएको छ’ उहाँले भन्नुभयो– ‘यसका विरुद्ध विद्यार्थी आन्दोलन अपरिहार्य रहेको छ । अखिल (छैठौं) ले एकल वा संयुक्त रूपमा सङ्घर्षमा जाने र सबैलाई आन्दोलनमा आउन अपिल गरेको छ ।’
भेलालाई अखिल (छैठौं) का महासचिव पुरन पोख्रेल, अखिल नेपाल जनजाति सम्मेलनका अध्यक्ष निमबहादुर बुढा, नेकपा (मसाल) काठमाडौँका प्रवक्ता जगत् रेग्मी, अखिल (छैठौं) का पूर्व केन्द्रीय सल्लाहकार भीष्म जोशी, राष्ट्रिय सहकारी अभियानका महासचिव रमेश पौडेल, अखिल नेपाल युवक सङ्घका नेता वरुणध्वज मल्ललगायतले शुभकामना दिनुभएको थियो ।
कार्यक्रमको अध्यक्षता पूजा बेलवासेले, स्वागत निशा गौतमले र सञ्चालन समष्टि बुढामगरले गर्नुभएको थियो ।
अध्यक्षमा थापा
भेलाले सङ्गम थापा अध्यक्ष रहनुभएको १९ सदस्यीय बागमती प्रदेश समिति गठन गरेको छ ।
समितिको उपाध्यक्षमा मिलन सिंह, सचिवमा पूजा बेलवासे, सहसचिवमा आदित्य पन्त र कोषाध्यक्षमा राजन जिसी चयन हुनुभएको छ ।
त्यस्तै सदस्यमा विश्वमोहन जिसी, दीपेन्द्र कार्की, विश्व पुन, दीपक बन्जाडे, सङ्गिता डाँगी, आशिका कार्की, अन्जली परियार, सुप्रभात कार्की, जुना केसी, मनोज ज्ञवाली, विनोद ऐर, विकास विष्ट र सुभम बन्जाडे रहनुभएको छ ।
