काठमाडौँ । राष्ट्रिय जनमोर्चाका अध्यक्ष तथा सांसद चित्रबहादुर केसीले वामपन्थीले मात्रै साम्राज्यवादको विरुद्धमा लड्न सक्ने बताउनुभएको छ ।
साम्राज्यवादी युद्धको विरुद्ध २०८२ असार २७ गते शुक्रबार १२ राजनीतिक दल तथा संस्थाद्वारा आयोजित विरोधसभालाई सम्बोधन गर्दै उहाँले यस्तो अभिव्यक्ति दिनुभएको हो ।
‘आजको यो प्रदर्शनले देखाएको छ, वामपन्थीले मात्रै विदेशी साम्राज्यवादको विरुद्ध लड्न सक्छ’ उहाँले अगाडि भन्नुभयो–’नेपालमा देशभक्तिपूर्ण आन्दोलन पनि कम्युनिस्ट पार्टीले नै चलाउने गरेको छ ।’
देशमा वापमन्थी शक्ति एमालेले नै सरकार चलाएको प्रसङ्गतर्फ इङ्गित गर्दै उहाँले यसबारेमा सरकार नबोलेकोमा चिन्ता व्ययक्त गर्नुभयो ।
‘इजरायलले प्यालेस्टाइनमा बर्बर अत्याचार गरिरहेको छ’ उहाँले भन्नुभयो– ‘अन्तर्राष्ट्रिय अदालतले समेत इजरायलका राष्ट्रपति बेन्जामिन नेतान्याहुलाई युद्ध अपराधी घोषणा गरेर पक्राउ आदेश जारी गरेको छ । हाम्रो सरकारले यसबारेमा के गरिरहेको छ ?’
अध्यक्ष केसीले साम्राज्यवादी स्वार्थसित जोडिएको कारणले नै नेपाल सरकार यसबारेमा बोल्न नसकेको दाबी गर्नुभयो ।
‘यस्तो गम्भीर अवस्थामा हाम्रो सरकारले खालि मेलमिलाप गर्नुपर्छ भनेर चिठी पठाइरहेको छ’ उहाँले व्यङ्ग्य कस्नुभयो– ‘यो भनेको डर नहीं लगता है, थरथरी लागता है भनेजस्तै हो ।’
उहाँले यस सम्बन्धमा नेपाल सरकारले धारणा राख्नुपर्नेमा जोड दिनुभयो ।
प्यालेस्टाइनको समस्या नेपालमा समेत आउन सक्ने धारणा उहाँको थियो ।
साम्राज्यवाद रहेसम्म युद्ध यथावत् रहने बताउँदै उहाँले भन्नुभयो– ‘अमेरिकी साम्राज्यवादले सिङ्गो मानव समुदायमाथि नै आक्रमण गरिरहेको छ । विश्वभरि नरसंहार मच्याइरहेको छ ।’
उहाँले जोड दिएर भन्नुभयो– ‘या त मानव समुदायले साम्राज्यवादको अन्त गर्नुपर्छ, होइन भने साम्राज्यवादले सिङ्गो मानव समुदायलाई नै ध्वस्त पार्नेछ ।’
नेपालमा साम्राज्यवादी हस्तक्षेप गम्भीर रहेको स्पष्ट पार्दै अध्यक्ष केसीले साम्राज्यवाद विरुद्धको यस्तो सहकार्यले निरन्तरता पाउनुपर्ने आवश्यकतामा जोड दिनुभयो ।
उहाँले भन्नुभयो– ‘गाजामा जस्तै हामी पनि भाग्ने दिन आउन सक्छ किनकि हामी पनि साम्राज्यवादको सिकार भइरहेका छौँ ।’
