बुटवल । भदौमा कर्णाली अभियान तथा चैतमा कलासाहित्यसम्बन्धी विचारगोष्ठी गर्ने निर्णयसँगै रक्तिम सांस्कृतिक अभियानको प्रथम राष्ट्रिय भेलाको समापन भएको छ ।
२०८२ जेठ १६ देखि रुपन्देहीको बुटवलमा सुरु भएको सो भेला जेठ १७ गते शनिबार समापन भएको हो ।
भेलाको उद्घाटनपश्चात् विभिन्न विषयमा सैद्धान्तिक प्रशिक्षण सञ्चालन गरिएको थियो । सो क्रममा दुर्गानाथ खरेलद्वारा धर्म र संस्कृति, सुरेश थापाद्वारा सममामयिक राजनीति, गिरीप्रसाद बुढाद्वारा कला र साहित्य, महासचिव हेमराज आश्रमद्वारा रक्तिम अभियात्रीका काम र कर्तव्यसम्बन्धी प्रशिक्षण दिनुभएको थियो ।
प्रशिक्षणलगत्तै झलक पुन (बागलुङ), मेघराज गौतम (नवलपरासी) र कल्पना भट्टराई (कपिलवस्तु) रहेको तीन सदस्यीय अध्यक्षमण्डल गठन गरी बन्द सत्रको कार्यक्रम अगाडि बढाइएको थियो ।
बन्द सत्रमा महासचिव हेमराज आश्रमद्वारा साङ्गठनिक प्रतिवेदनका साथै आगामी कार्यक्रम प्रस्तुत गरिएको थियो भने अध्यक्ष गिरिप्रसाद बुढाद्वारा आर्थिक प्रतिवेदन प्रस्तुत गरिरएको थियो ।
व्यापक छलफलका साथ दुवै प्रतिवेदनका साथै आगामी कार्यक्रमको प्रस्ताव पारित गरिएको थियो ।
भेला समापनको क्रममा सहभागी प्रतिनिधिको तर्फबाट कुलबहादुर छन्त्याल (बागलुङ), कृष्ण गिरी (नवलपुर) र भावनाकुमारी शाही (कालीकोट) ले मन्तव्य व्यक्त गर्नुभएको थियो ।
त्यसैगरी, वामपन्थी नेता सुरेश थापाले भेलाले निर्धारण गरेका कार्यक्रमलाई सफल पार्नको लागि रक्तिम सांस्कृतिक अभियानलाई शुभकामना दिनुभएको थियो ।
नेता थापाको शुभकामनापश्चात् अध्यक्षमण्डलका अध्यक्ष मेघराज गौतमले भेलाको सम्पूर्ण कार्यक्रम सकिएको घोषणा गर्दै कार्यक्रम समापन गर्नुभएको थियो ।
आगामी कार्यक्रममा यस प्रकार रहेका छन् :
१. २०८२ असार–साउनमा जिल्लाका बैठक तथा भेलाका कार्यक्रम सञ्चालन गर्ने । सदस्यता अभियानलाई निरन्तरता दिने ।
२. २०८२ भदौ महिनामा कर्णाली अभियान सञ्चालन गर्ने ।
३. २०८२ असोज महिनामा केन्द्रीयस्तरको केन्द्रीय प्रशिक्षक प्रशिक्षण कार्यक्रम सञ्चालन गर्ने । साथै जिल्लामा जिल्लास्तरीय सांस्कृतिक प्रशिक्षण सञ्चालन गर्ने ।
४. २०८२ कात्तिक महिनामा देउसीभैलो कार्यक्रम सञ्चालन गर्ने । साथै लक्ष्मी गुरुङ स्मृति कार्यक्रम र कोष व्यवस्थापन गर्ने ।
५. २०८२ मङ्सिरमा जिल्लाका भेला तथा सम्मेलनको कार्यक्रम गर्ने ।
६. माघ महिनाको १६ र १७ गते सैद्धान्तिक प्रशिक्षणका साथै टिकट सो कार्यक्रम गर्ने ।
७. २०८२ चैत महिनामा पत्रिकाको लागि विज्ञापनको खोजी गर्ने । चैत अन्तिम हप्तामा काठमाडौँमा साहित्य र कलासम्बन्धी विचारगोष्ठी गर्ने ।
]८. २०८२ को अन्तसम्म रक्तिम अभियानको मुखपत्र प्रकाशित गरिसक्ने ।
