दाङ । राष्ट्रिय जनमोर्चा केन्द्रीय सदस्य तथा दाङ जिल्ला अध्यक्ष गणेश आचार्यले गणतन्त्रको विकल्प खोज्ने बेला भइनसकेको बताउनुभएको छ ।
‘प्रतिगामी खतराका विरुद्धमा सङ्घर्ष गरौँ, गणतन्त्रको रक्षा गरौँ’ नाराका साथ राजमोले बङ्गलाचुली गाउँपालिकाको कमिरेचौरमा आयोजना गरेको सभालाई सम्बोधन गर्दै उहाँले उक्त कुरा बताउनुभएको हो ।
‘अहिले प्रतिगामीले गणतन्त्रमाथि हमला गर्नु कारण सत्ता सञ्चालकको कमजोरी हो’ उहाँले भन्नुभयो– ‘हामीले त्यो कमजोरी सुधार गर्ने कोसिस गर्ने हो तर यसको विकल्प भनेर प्रतिगामी बाटोमा जाने हैन ।’
बङ्गलाचुली गाउँपालिका प्राकृतिक रूपमा सम्पन्न हुँदाहुँदै पनि जनताको जीवनस्तर अत्यन्तै कमजोर भएको उहाँको धारणा थियो ।
उहाँले भन्नुभयो– ‘हाम्रा प्राकृतिक स्रोतबाट यहाँका मुट्ठीभर र भारतीय व्यापारीहरू मात्र मोटाउने काम भएको छ । त्यसैका कारण जनताको जीवन झनै कष्टकर भएको छ ।’
कार्यक्रमको सहजीकरण अखिल नेपाल किसान महासङ्घ (अप्फा) दाङका सचिव मनिराम खनालले गर्नुभएको थियोे ।
सो अवसरमा अप्फाका पूर्व केन्द्रीय कोषाध्यक्ष प्रेमनारायण आचार्यको पनि उपस्थिति रहेको थियोे ।
