काठमाडौँ । राष्ट्रिय जनमोर्चा काठमाडौँले प्रतिगामी खतराका विरुद्ध चन्द्रागिरी नगरपालिकाको गुर्जुधारा र सिर्जनाचोकमा सभा सम्पन्न गरेको छ ।
२०८२ वैशाख २० गते शनिबार उपर्युक्त दुई स्थानमा विरोधसभा सम्पन्न गरिएको हो ।
गुर्जुधारा
चन्द्रागिरीको गुर्जुधाराको कार्यक्रम राजमो काठमाडौँका अध्यक्ष झबिन्द्र बेलबासेको अध्यक्षता तथा सचिव छवि खनालको सञ्चालनमा अगाडि बढेको थियो ।
कार्यक्रमलाई सम्बोधन गर्दै राजमो केन्द्रीय सदस्य तथा बागमती प्रदेश समितिका अध्यक्ष लालबहादुर थापाले देशको राजनीतिक परिस्थितिमा परिवर्तन आएको बताउनुभयो ।
राजावादी शक्तिहरू सलबलाउन थालेको बताउँदै उहाँले नेपाली जनताले लडेर ल्याएको गणतन्त्र र धर्मनिरपेक्षतामाथि खतरा मौलाउन थालेकाले त्यसका विरुद्ध जनतामा जागरण ल्याउन राजमो काठमाडौँले पालिकास्तरमा सभाको कार्यक्रम राखेको बताउनुभयो ।
त्यस्तै, अर्का वक्ता नेकपा (मसाल) काठमाडौँका प्रवक्ता जगतप्रसाद रेग्मीले सत्तासिन दलको कुशासनका कारण गणतन्त्र विरुद्ध राजावादीको आक्रमण बढेको बताउनुभयो ।
तत्कालै नयाँ जनवाद र समाजवादमा जान नसकिने अवस्थामा गणतन्त्रको विकल्प राजतन्त्र हुन नसक्ने धारणा उहाँको थियो ।
सिर्जनाचोक
सोही दिन, चन्द्रागिरी नगरपालिकाकै सिर्जनाचोकमा अर्को विरोधसभा सम्पन्न भएको थियो ।
सभालाई सम्बोधन गर्दै नेकपा (मसाल) ३ नम्बर प्रदेश ब्युरोका प्रवक्ता समीर सिंहले राजमोले लोकतन्त्र, गणतन्त्र र धर्मनिरपेक्षता रक्षाको आन्दोलनलाई गाउँगाउँमा पुऱ्याइरहेको जानकारी दिनुभयो ।
देशमा भारत उत्तर प्रदेशका मुख्यमन्त्री आदित्यनाथको फोटो राखेर राजावादीले गरेको प्रदर्शन धेरै कुरा बताइरहेको उहाँको धारणा थियो ।
राजावादीको चरित्रको बारेमा गत दुई सय ४० वर्षको इतिहासले बताइसकेको बताउँदै उहाँले गत चैत १५ गतेको घटनाले राजावादी चरित्रको बारेमा प्रशस्त बुझ्न सकिने उहाँको भनाइ थियो ।
जातीय समता समाजका महासचिव भक्त विकले गणतन्त्र स्थापनापछिका सरकारले जनताको पक्षमा काम गर्न नसकेपछि त्यसबाट फाइदा उठाउँदै राजावादीले धमिलो पानीमा माछा मार्न खोजेको धारणा राख्नुभयो ।
राजाको शासनमा राष्ट्रियताको रक्षा हुने कुरा भ्रम मात्र रहेको बताउँदै उहाँले भन्नुभयो– ‘राजा महेन्द्रको पालामा आफ्नो शासनसत्ता कायम राख्नकै लागि कालापानीमा भारतीय सेना यथावत् राखिएको थियो ।’
कार्यक्रमलाई सम्बोधन गर्दै राजमो काठमाडौँकी लक्ष्मी केसीले लोकतान्त्रिक गणतन्त्र आएपछि नेपालमा महिलाको अवस्थामा सुधार हुन थालेको दाबी गर्नुभयो ।
उहाँले नयाँ व्यवस्थामा महिलाका शिक्षा र स्वास्थ्यको सहभागिता बढेको बताउनुभयो ।
अखिल नेपाल प्रगतिशील लेखक सङ्घ (अन्पा) का केन्द्रीय सदस्य जीवनारायण खनालले राजाका निरङ्कुश र एकतन्त्रीय शासन नेपाली जनताले व्यहोरिसकेको बताउनुभयो ।
खनालले यो गणतन्त्रलाई टेकेर योभन्दा अझ उच्चस्तरको व्यवस्थाका लागि सङ्घर्ष गर्नुपर्ने आवश्यकतामा जोड दिनुभयो ।
कार्यक्रमको अध्यक्षता राजमो काठमाडौँका सदस्य रोशन दानीले र सञ्चालन राजमो काठमाडौँकै अर्का सदस्य डम्मर कार्कीले गर्नुभएको थियो ।
दुवै स्थानका कार्यक्रममा रक्तिम सांस्कृतिक अभियानका कलाकारले “किन चाहियो सङ्घीयता” शीर्षकको गीतमा नृत्य प्रस्तुत गर्नुभएको थियो । सिर्जनाचोकको कार्यक्रममा कलाकारले “लालसलाम” शीर्षकको अर्को गीतमा समेत नृत्य प्रस्तुत गर्नुभएको थियो ।
