खुम रायमाझी, तौलिहवा ।
नेकपा (मसाल) र राष्ट्रिय जनमोर्चाका सदस्य यशोदा जिसीको स्मृतिमा शोकसभा सम्पन्न भएको छ ।
२०८१ चैत ११ गते सोमबार उहाँकै निवासस्थान बाणगङ्गा नगरपालिकाको मधुवनमा सो कार्यक्रम सम्पन्न भएको हो ।
कार्यक्रममा राजमो लुम्बिनी प्रदेश समितिका अध्यक्ष बोमबहादुर खत्री, राजमो कपिलवस्तुका अध्यक्ष रामप्रसाद बेलबासे, नेकपा (मसाल) कपिलवस्तुका प्रवक्ता माधव भाटक्षेत्री, राजमो कपिलवस्तुका सल्लाहकार दधिराम आचार्य र अखिल नेपाल महिला सङ्घ कपिलवस्तुकी सचिव रिता पाण्डेले शोकमन्तव्य राख्नुभएको थियो ।
वक्ताहरूले यशोदाले नेकपा (मसाल) तथा राष्ट्रिय जनमोर्चामा दिनुभएको योगदानलाई स्मरण गर्दै उहाँको बाटोमा हिँड्न सम्पूर्ण परिवारलगायत सबैसित अपिल गर्नुभयो ।
स्मृतिशेष यशोदाका पतिसमेत रहनुभएका राजमो नेता डबलसिंह जिसीको अध्यक्षता तथा प्रगतिशील पत्रकार सङ्घका केन्द्र्रीय सल्लाहकार शशि सापकोटाको सञ्चालनमा उक्त कार्यक्रम अगाडि बढेको थियो ।
२०१४ भदौ १४ गते जन्मनुभएका स्मृतिशेष यशोदाको गते चैत ३ गते निधन भएको थियो । उहाँको परिवारमा पति डबलसिंह जिसी, तीन छोरा, तीन बुहारीलगायत हुनुहुन्छ । उहाँहरू प्युठान चुँजाबाट बसाइँसराइ गरेर २०३२ सालमा कपिलवस्तु आउनुभएको थियो ।
जिल्ला पार्टी प्रवक्ता भाटक्षेत्रीका अनुसार उहाँले २०६४ सालमा मसालको पार्टीसदस्य हुनुहुन्थ्यो । पार्टीमा उहाँको टेकनाम कमरेड भीमा रहेको थियो ।
