तौलिहवा । राष्ट्रिय जनमोर्चा कपिलवस्तुका सचिव केरसिंह अदैसमेतका बुबा हर्कबहादुर अदैको निधन भएको नवौँ दिन शोकसभा सम्पन्न भएको छ ।
राजमो कपिलवस्तुको आयोजनामा खरेन्द्रपुरमा सो कार्यक्रम सम्पन्न भएको हो ।
बिनिता अदैको अध्यक्षतामा अघि बढेको उक्त कार्यक्रममा अखिल नेपाल ट्रेड युनियन महासङ्घ (अन्टुक) का अध्यक्ष लोकराज भुसालको प्रमुख आतिथ्य रहेको थियो ।
कार्यक्रममा शोकमन्तव्य राख्दै भुसालले मृत्यसंस्कारको सन्दर्भमा समेत रूढिवाद तथा अन्धविश्वासलाई चिर्न आवश्यक रहेको बताउनुभयो ।
शोकसभामा राजमो कपिलवस्तुका अध्यक्ष रामप्रसाद बेलबासे, नेकपा (मसाल) कपिलवस्तुका प्रवक्ता माधव भाटक्षेत्री, अन्तर्राष्ट्रिय नेपाली एकता समाजका महासचिव खुम रायमाझी, नेकपा (एमाले) का केन्द्रीय सदस्य रामलाल काफ्ले र नेपाली काङ्ग्रेसका प्रतिनिधि गङ्गाधर भट्टराईले पनि शोकमन्तव्य राख्नुभएको थियो ।
शोकाकुल अदैले स्मृतिशेष बुबा अदैको जीवनी, पारिवारिक विवरण, राजनीतिक क्रियाकलापमा सहभागिता तथा सामाजिक कार्यबारे जानकारी गराउनुभएको थियो ।
सो क्रममा उहाँले स्मृतिशेष बुबाको नाममा बागलुङ ढोरपाटनमा प्रतिक्षालय निर्माण गर्ने जानकारी दिनुभयो । अदैले यसअघि आफ्नी आमाको नाममा श्री समयथान मावि खरेन्द्रपुरमा अक्षयकोष राखेर प्रत्येक वर्ष पाँच जना गरिब, अपाङ्ग, अनाथ र विद्यालय प्रथमलाई ५०० रुपैयाँको दरले प्रोत्साहन गर्दै आउनुभएको छ ।
स्मृतिशेष अदैका तीन छोरा जेठा मनबहादुर अदै, माहिलो केरसिंह अदै, कान्छो जीवन अदै तथा एक छोरी यमकुमारी भण्डारी हुनुहुन्छ ।
