काठमाडौँ । राष्ट्रिय जनमोर्चाका अध्यक्ष चित्रबहादुर केसीले सरकारले पूर्वविशिष्ट पदाधिकारीहरूलाई आजीवन सुविधा दिन कानुन बनाउन लागेप्रति आपत्ति जनाउनुभएको छ ।
आइतबार प्रतिनिधि सभा बैठकमा बोल्दै केसीले सरकारप्रति कटाक्ष गर्दै ‘स्याल बहुलायो भने सहर पस्छ’ भन्नुभयो ।
‘यस्तो आर्थिक अवस्था देख्दादेख्दै, लाखौँ युवायुवती विदेशका गल्लीमा भौँतारिदा भौँतारिदै, यस्तो बेलामा सरकारले पूर्वविशष्टिहरूलाई उनीहरूको सेवा सुविधाका लागि कानुनी व्यवस्था गरेर सुविधा दिने व्यवस्था गर्दैछ। यो के गरेको यस्तो ?’
उहाँले व्यवस्थाविरुद्ध नै षडयन्त्र भइरहेको बेला सरकारले गलत गरेको भन्दै पूर्वविशिष्टलाई दिन लागिएको सेवासुविधाको निर्णय फिर्ता लिन माग गर्नुभयो ।
केसीले थप्नुभयो, ‘स्याल बहुलायो भने सहरतिर पस्छ भन्ने उखान छ नेपाली समाजमा । यस्तो बेला हो ? पूर्व विशिष्टहरूले, उहाँहरूले दुःख पाउनुभाछ ? उहाँहरूको सेवा सुविधा पुगेन ?’
स्मरणीय छ, आजै संसदमा उपप्रधानमन्त्री एवं अर्थमन्त्री विष्णु पौडेलले बोल्नेक्रममा सरकारलाई राजस्व उठाएर खर्च धान्न सकस परेको बताएका थिए ।
‘राजश्वले हाम्रो साधारण खर्च धौधौ भइरहेको अवस्था छ। यस्तो अवस्थामा हामीले बजेट निर्माण गर्दा अनुशासनतर्फ फर्किनका लागि विलम्व भइसकेको छ। हामीले विलम्ब गर्नु हुँदैन’ उनले भनेका थिए ।
नेपालको सार्वजनिक ऋण २६ खर्ब रुपैयाँभन्दा माथि उक्लिएको छ। यो भनेको कुल गार्हस्थ्य उत्पादन (जीडीपी) का आधारमा ४५.७७ प्रतिशत हो।
सार्वजनिक ऋण व्यवस्थापन कार्यालयका अनुसार चालु आर्थिक वर्ष २०८१र८२ को माघ महिनासम्म सार्वजनिक ऋण २६ खर्ब ११ अर्ब ६ करोड पुगेको छ। चालु आवमा सरकारले २ खर्ब ९० अर्ब ५७ करोड रुपैयाँ ऋण लिएको छ।
यस्तै, हाल सरकारको बजेट घाटा १ खर्ब ५ अर्ब पुगेको छ। अहिलेसम्म सरकारले ८ खर्ब ३९ अर्ब खर्च गर्दा ७ खर्ब ३८ अर्ब मात्रै आम्दानी गरेको छ।
