काठमाडौँ । राष्ट्रिय जनमोर्चाका महासचिव मनोज भट्टले सङ्घीयताको जननी पुष्पकमल दाहाल प्रचण्ड नभएर भारत भएको दाबी गर्नुभएको छ ।
राजमो काठमाडौँको आयोजनामा २०८१ माघ २३ गते बुधबार गोङ्गबुँमा आयोजित सभालाई सम्बोधन गर्दै उहाँले सो दाबी गर्नुभएको हो ।
नेकपा (माओवादी केन्द्र) का अध्यक्ष प्रचण्डले नेपालमा सङ्घीयताको जननी आफू भएको भन्दै दिने गरेको अभिव्यक्तिलाई ठाडै उहाँले खारेज गर्नुभयो ।
‘प्रचण्डले भन्दै हिँड्नुभएको छ, नेपालमा सङ्घीयताको जननी म हुँ’ उहाँले भन्नुभयो– ‘त्यो कुरा गलत हो । नेपालमा सङ्घीयताको जननी भारत हो । त्यतिखेर नेपालका लागि भारतीय राजदूत शिवशङ्कर मुखर्जी हुन् ।’
उहाँले २०६३ सालको अन्तरिम संविधानमा सङ्घीयता सामेल गर्नका लागि भारतले मधेसवादी आन्दोलन प्रायोजित गरेको प्रसङ्ग अगाडि सार्नुभयो ।
महासचिव भट्टले भन्नुभयो– ‘भारतले हजारौँ भारतीय नागरिकलाई आन्दोलन गर्नका लागि मधेस पठायो । त्यति मात्रै होइन, लैनचौरमा मधेसवादी र नेपालका सत्ताधारीको बैठक बसेपछि सङ्घीयता स्वीकारिएको हो ।’
उहाँले प्रश्न गर्नुभयो– ‘अब भन्नुस्, नेपालमा सङ्घीयताको जननी प्रचण्ड हुन् कि भारत ?’
रविले अब प्रभु बैङ्क डुबाउँछन्
फरक प्रसङ्गमा उहाँले राष्ट्रिय स्वतन्त्र पार्टीका सभापति रवि लामिछानेले अब प्रभु बैङ्क डुबाउने आशङ्का व्यक्त गर्नुभयो ।
‘सहकारी त रविले डुबाए नै, अब प्रभु बैङ्क डुबाउँछन्’ उहाँले भन्नुभयो– ‘पोखराको धरौटी प्रभु बैङ्कले, बुटवलको धरौटी प्रभु बैङ्कले,
काठमाडौँको धरौटी प्रभु बैङ्कले तिरिदिने कुरा भयो । अब उनले प्रभु बैङ्क डुबाए ।’
सहकारीका ८१४ ओटा चेक काटेको बताउँदै उहाँले अगाडि भन्नुभयो– ‘त्यस क्रममा रविले ४८ करोड रुपियाँ रकम डुबाएका छन् ।
आवाज दबाउन सामाजिक सञ्जाल विधेयक
सम्बोधनको क्रममा उहाँले जनताको आवाज दबाउन सामाजिक सञ्जालसम्बन्धी विधेयक ल्याइएको बताउनुभयो ।
उहाँले भन्नुभयो– ‘सरकारको चौतर्फी विरोध हुन थालेपछि सामाजिक सञ्जालसम्बन्धी विधेयक ल्याइएको छ ।’
उहाँले सामाजिक सञ्जाल नहुने हो भने सरकारका भ्रष्ट कामकारबाहीबारे जनतालाई थाहा हुन नसक्ने बताउनुभयो ।
‘सामाजिक सञ्जाल नभएको भए जनतालाई सुनतष्करीबारे थाहा हुने थिएन’ उहाँले भन्नुभयो– ‘त्यस्तै नक्कली भुटानी शरणार्थी काण्ड, गिरीबन्धु टी स्टेटबारे पनि जनताले सामाजिक सञ्जालबाटै थाहा पाएका हुन् ।’
मन्तव्यको क्रममा महासचिव भट्टले काङ्ग्रेस, एमाले र माओवादी एउटै ड्याङका मुला भएको स्पष्ट पार्नुभयो ।
सभामा नेकपा (मसाल) ३ नम्बर ब्युरोका प्रवक्ता समीर सिंह र अखिल नेपाल महिला सङ्घकी कोषाध्यक्ष ऋतु केसीले पनि मन्तव्य राख्नुभएको थियो।
राजमो टोखा नगर समितिका अध्यक्ष प्रेम भण्डारीको अध्यक्षतामा अघि बढेको उक्त सभाको सञ्चालन अखिल नेपाल युवक सङ्घका केन्द्रीय सल्लाहकार डम्बर कार्कीले गर्नुभएको थियो ।
