काठमाडौं । चितवनमा सवारी जाँच गर्नेक्रममा एक युवकलाई निर्घात कुटपिट गरेको भिडिओ बाहिरिएपछि एक प्रहरी अधिकारी निलम्बनमा परेका छन् ।
कुटपिट गर्ने प्रहरीलाई निलम्बन गरी थप कारबाही प्रक्रिया अघि बढाइएको जिल्ला प्रहरी कार्यालय चितवनले जनाएको छ ।
एसपी गौतम मिश्रका अनुसार घटना छानबिनका लागि डीएसपी ज्ञानकुमार महतोको नेतृत्वमा तीन सदस्यीय छानबिन समिति गठन गरिएको छ ।
चितवनको भरतपुर महानगरपालिकाको बाइपास सडकखण्डमा सवारी जाँचका क्रममा युवकलाई कुटपिट गरेको भिडिओ सामाजिक सञ्जालमा भाइरल बनेको छ ।
ति प्रहरीले युवकलाई भुईंमा पल्टाएर लात्तैलात्ताले हानेका छन् ।
‘माथिको पावर देखाएको’ भन्दै चेकिङमा खटिएका प्रहरीले युवकलाई लात्तीले हानेर कुटपिट गरेको भिडियो सार्वजनिक भएपछि प्रहरीले उनलाई कारबाहीका लागि छानबिन समिति बनाएको छ ।
प्रहरी प्रधान कार्यालय काठमाडौंले पनि युवकमाथि कुटपिट गरेको घटनाप्रति गम्भीर ध्यानाकर्षण भएको जनाएको छ ।
