घोराही । दाङको घोराही उपमहानगरपालिका वडा नं. १९ मा राष्ट्रिय जनमोर्चाले अनिश्चितकालीन तालाबन्दी गरेको छ ।
सुरक्षित नागरिक आवास कार्यक्रममा भ्रष्टाचार भएको भन्दै २०८१ पुस २८ गते आइतबार राजमो घोराही नगर समितिले तालाबन्दी गरेको हो ।
तालाबन्दी गर्न राजमो घोराही नगर समितिका अध्यक्ष मङ्गलबहादुर घर्तीमगर, नगर समितिका कोषाध्यक्ष झबिलाल कालाथोकी, राजमो जिल्ला सदस्य मेघराज भट्टराई र वडासमितिका सदस्य मिनबहादुर पुनसहितको प्रतिनिधिमण्डल वडा कार्यालय पुगेको थियो ।
सो अवसरमा नगर अध्यक्ष घर्तीमगरद्वारा जारी गरिएको प्रेसविज्ञप्तिमा गत कात्तिक ४ गते जनता आवास कार्यक्रममा अनियमितता तथा भ्रष्टाचार भएको विषयमा छानबिन गर्न भनी वडाअध्यक्ष ज्ञानबहादुर रायमाझीको नेतृत्वमा पाँच सदस्यीय अनुगमन तथा छानबिन समिति बनाइएकोमा सोअनुसार काम नभएकोमा विरोध गरिएको छ ।
छानबिन समितिले मङ्सिर १५ गते छानबिन प्रतिवेदन बुझाउने भनिएकोमा हालसम्म त्यसतर्फ कुनै काम नभएको भन्दै विज्ञप्तिमा आफूहरूले अनिश्चितकालीन तालाबन्दी गर्नुपरेको बताइएको छ ।
“नीतिगत भ्रष्टाचार र अनियमितताको विरुद्धमा हामी घोराही १९ नम्बर वडा कार्यालयमा अनिश्चितकालीन तालबान्दी गर्न बाध्य भएका छौँ” विज्ञप्तिमा भनिएको छ ।
त्यस्तै, विज्ञप्तिमा सो सम्बन्धमा सहयोग गरिदिन समपूर्ण जनसमुदायसित अपिल गरिएको छ ।
