काठमाडौँ । प्रधानमन्त्री दैवी प्रकोप उद्धार कोषमा २०८१ असोज २० गते आइतबारसम्म रु १० करोड २६ लाख सहयोग प्राप्त भएको छ ।

पछिल्लो सहयोगको रूपमा कोषका लागि प्रधानमन्त्री केपी शर्मा ओलीलाई आइएमई ग्रुपबाट रु पाँच करोड हस्तान्तरण भएको हो ।

त्यसैगरी, नेपाल बैङ्क लिमिटेडबाट रु दुई करोड, निर्माण व्यवसायी विकास परिषद्बाट रु एक करोड, एनएमबी बैङ्कबाट रु ५१ लाख, नेपाली कङ्ग्रेसबाट रु ५० लाख, नेपाल कम्युनिस्ट पार्टी (एमाले) बाट रु ५० लाख, नेपाल इन्स्योरेन्सबाट रु ५० लाख र मेटलाइफ इन्स्योरेन्सबाट रु २५ लाख सहयोग प्राप्त भएको प्रधानमन्त्रीको सचिवालयले जनाएको छ ।

यही असोज ११ र १२ गतेको अविरल वर्षाका कारण आएको बाढीपहिरो र डुबानबाट जनधनको क्षति भएपछि पीडितका लागि कोषमा सहयोग प्राप्त हुने क्रम जारी रहेको छ ।