बागलुङबजार । राष्ट्रिय जनमोर्चा बागलुङले २१ बुँदे माग राख्दै २०८१ भदौ २३ गते आइतबार बागलुङ नगरपालिका प्रमुख वसन्तकुमार श्रेष्ठलाई ज्ञापनपत्र बुझाएको छ ।
राजमो गण्डकी प्रदेश समितिका उपाध्यक्ष उपाध्यक्ष धर्म कुँवरको नेतृत्वमा गएको प्रतिनिधिमण्डलले सो ज्ञापन बुझाएको हो ।
प्रतिनिधिमण्डलमा राजमो जिल्ला सचिवालय सदस्य थानेश्वर सुवेदी, राजमो नेतृ लक्ष्मी बास्कोटा, जिल्ला सदस्य योगेन्द्र पौडेल, जिल्ला सल्लाहकार टेकबहादुर आरसी, बागलुङ नगर समितिका सदस्य, अखिल नेपाल जनजाति सम्मेलन गण्डकी प्रदेश समितिका सदस्य तुलवीर श्रीस, अखिल नेपाल महिला सङ्घकी आशा केसी, राजमो नेता विष्णुप्रसाद अधिकारीलगायतको उपस्थिति रहेको थियो ।
नगरप्रमुखको कार्यकक्षमा सुवेदीले नगरप्रमुख श्रेष्ठलाई ज्ञापनपत्र वाचन गरेर सुनाउनुभएको थियो ।
प्रमख श्रेष्ठलाई बुझाइएको ज्ञापनमा स्थानीय तहले तत्काल गर्नुपर्ने कामको सूची उल्लेख गरिएको छ ।
त्योसँगै नगर चक्रपथ बनाउनुपर्ने, बानपा १० को दब्ल्याङ पहिरो नियन्त्रण गर्दै सहज यातायातको व्यवस्था गर्नुपर्ने, सबै वडामा बाह्रै महिना सवारी चल्ने सडक बनाउनुपर्नेलगायतका माग उल्लेख गरिएको छ ।
राजमोले आधारभूत स्वास्थ्य सेवा अनिवार्य बनाउनुपर्ने, जनप्रतिनिधिका बालबालिका सरकारी विद्यालयमा पढाउनुपर्ने, पालिकाले बेरुजु रकम घटाउनुपर्ने जस्ता माग गरेको छ ।
कृषिको व्यावसायीकरण बढाउन हाटबजार मार्फत किसानलाई बजारीकरणमा साथ दिनुपर्ने, बजारमा भेटिने म्याद गुज्रेका सामान हटाउनुपर्ने र त्यस्ता सामाग्री बेच्नेलाई कारवाही गर्न ज्ञापन–पत्रमा माग गरिएको छ ।
चाडपर्वमा सुपथ मूल्य पसलमार्फत जनताको आवश्यकता पुरा गर्नुपर्ने र कुटिर उद्योगको सञ्चालन गरेर रोजगारी बढाउन माग गरिएको छ ।
राजमोले सङ्घीय सरकारमार्फत सङ्घीयताको खारेजीको माग गर्दै संविधान संशोधन गर्ने भए सङ्घीयता खारेजी गर्नुपर्ने शर्त अगाडि सारेको छ ।
राष्ट्रियता, सार्वभौमसत्ता र अखण्डताको रक्षाका लागि नेपाल–भारतबिच सन् १९९० मा भएको असमान सन्धिसहित नेपाल विरुद्ध भएका असमान सन्धिसम्झौता खारेजीको माग गरेको छ ।
राजमोको ज्ञापनपत्र बुझ्दै बागलुङ नगरपालिकाका प्रमुख श्रेष्ठले बेरुजु घटाउने काममा सफलता पाएको भन्दै शून्य बेरुजु नजिक लैजाने प्रतिबद्धता जनाउनुभयो ।
विकास निर्माणमा जनताको सहभागिता बढाउने, जनस्तरबाट उठेका योजनामा प्राथमिकता दिने नगरप्रमुख श्रेष्ठको प्रतिबद्धता थियो ।
सबै पालिका तहमा ज्ञापनपत्र बुझाउने क्रममा राजमोले बागलुङका ७ पालिकामा ज्ञापन बुझाइसकेको जनाएको छ ।
