काठमाडौं । राष्ट्रिय स्वतन्त्र पार्टी (रास्वपा) का महामन्त्री एवम् प्रवक्ता मुकुल ढकाल मुखमा कालो टेप लगाएर पार्टी बैठकमा सहभागी भएका छन् ।
बुधबार बसेको रास्वपा केन्द्रीय समितिको बैठकमा बोल्न पाउने अधिकार हनन भएको आरोप लगाउँदै महामन्त्री ढकाल मुखमा मास्क र त्यसमाथि कालो टेप लगाएर सहभागी भएका हुन् ।
समीक्षा यात्राको प्रतिवेदनका कुरा सार्वजनिक गरेपछि उनी विवादमा परेका छन् ।
कांग्रेस–एमालेको गठबन्धन बन्नुअघि नै महामन्त्री ढकालको समीक्षा यात्राको प्रतिवेदनले खैलाबैला मच्चिएको रास्वपालाई पछिल्लो राजनीतिक परिस्थितिको तनाव पनि थपिएको छ।
महामन्त्री ढकालको प्रतिवेदनसँगै पछिल्लो राजनीतिक परिस्थितिबारे छलफल गर्न रास्वपाको केन्द्रीय समितिको बैठक पार्टीको केन्द्रीय कार्यालय वनस्थलीमा बसिरहेको हो।
नेकपा माओवादी केन्द्रका अध्यक्ष पुष्पकमल दाहाल प्रचण्ड नेतृत्वको वर्तमान सरकारमा रहेको रास्वपाले नयाँ बनेको कांग्रेस–एमाले गठबन्धनको सरकारमा सामेल नहुने यसअघि नै बताइसकेको छ।
वर्तमान सरकारमा रास्वपा सभापति रवि लामिछाने (उपप्रधान तथा गृहमन्त्री) को नेतृत्वमा सामेल छ।
