अमेरिकाविरुद्ध भारतलाई तटस्थ राख्न चीनले कालापानीमा समर्थन जनायो : भट्ट

शनिबार, भदौ ३०, २०८० मा प्रकाशित

काठमाडौं । राष्ट्रिय जनमोर्चाका महासचिव मनोज भट्टले प्रधानमन्त्री पुष्पकमल दाहालले चीन भ्रमणका बेला कालापानीबारे कुरा उठाउन सुझाव दिनुभएको छ ।

शनिबार राष्ट्रिय जनमोर्चा, डोटीको दोस्रो जिल्ला सम्मेलनलाई सम्बोधन गर्दै महासचिव भट्टले चीनसँग कालापानीको कुरा उठाउन भारतसँग जस्तो खुट्टा नकमाउन सुझाव दिनुभयो ।

‘प्रधानमन्त्री प्रचण्डले मन नलागी नलागी चीन भ्रमण गर्दै हुनुहुन्छ । यो भ्रमण कुनै उपलब्धिमुलक हुन्छ भन्नेमा हामीलाई विश्वास छैन । किनभने प्रचण्डले भारत भ्रमणअघि भारतको उक्साहटमा चीनले बनाइरहेका जलविद्युत आयोजना खोसिसक्नुभएको छ । चीनले बनाएको बिजुली नकिन्न भारतसँग सम्झौता गरिसक्नुभएको छ’ महासचिव भट्टले भन्नुभयो, ‘तर, चीन भ्रमणका क्रममा कालापानीबारे प्रचण्डले कुरा उठाउन मैले यहाँबाट सुझाव दिन्छु ।’

महासचिव भट्टले भारत भ्रमणका क्रममा सम्बन्ध बिग्रन्छ भनेर कालापानीको कुरा नउठाएको भन्ने प्रचण्डको अभिव्यक्ति स्मरण गर्दै भारतसँग जस्तो चीनसँग खुट्ट नकमाउन सुझाव दिनुभयो ।

उहाँले चीन र अमेरिकाबीच हुनसक्ने सम्भावित युद्धमा चीनले भारतलाई तटस्थ राख्न चाहेको बताउनुभयो ।

‘कालापानी नेपालको हो भन्ने चीनलाई थाह नभएको हो र ? तर चीनले नयाँ नक्सा बनाउँदा भारततर्फ देखाइदिएको छ’ भट्टले भन्नुभयो, ‘किनकी अमेरिकासँग यु्द्ध गर्दा चीनले भारतलाई तटस्थ राख्न चाहन्छ । भारतलाई चिढ्याउन चाहँदैन । त्यही कारण भारतलाई खुशी पार्न चीनले नेपालको भूभाग भारततर्फ देखाइदिएको छ ।’

महासचिव भट्टले फरक प्रशंगमा सत्ताधारी दलहरुले भ्रष्टाचारको संरक्षण गरिरहेको उल्लेख गर्दै कांग्रेस एमाले भन्दा आफूलाई फरक देखाउने माओवादी शान्ति प्रक्रियामा आएपछि चार पटक सरकारको नेतृत्व गरेको र झण्डै सय जना मन्त्री हुँदा देशले के पायो भनी प्रश्न गर्नुभयो ।

सम्मेलनले राजमो डोटीको नयाँ नेतृत्व चयन गरेको छ ।

सम्मेलनअघि दिपायल बजारमा जुलुश प्रदर्शन गरिएको थियो ।

राष्ट्रिय जनमोर्चा डोटीको अध्यक्षमा बोगटी, सचिवमा खड्का