प्युठान । राष्ट्रिय जनमोर्चाका उपाध्यक्ष एवम् प्युठानबाट प्रतिनिधि सभाका उम्मेदवार दुर्गा पौडेलले प्युठानमा गठबन्धनको जीत सुनिश्चित देखिएको बताउनुभएको छ ।
शनिबार युगदर्शनसँग कुरा गर्दै पौडेलले जनताको बिचमा जाँदा गठबन्धनप्रति देखिएको उत्साहले आफूहरुको विजय सुनिश्चित देखिएको स्पष्ट पार्नुभयो ।
‘जनतामा गठबन्धनप्रति व्यापक उत्साह छ । हामी घरदैलोमा जहाँ–जहाँ पुगेका छौँ, मतदाताले गठबन्धनका उम्मेदवारप्रति देखाएको अपार समर्थनले हाम्रो जीत सुनिश्चित देखिन्छ’ पौडेलले भन्नुभयो, ‘अब मंसिर ४ गते जनताले मतदानमार्फत विजयलाई औपचारिकता दिने छन् ।’
निवर्तमान सांसद पौडेलले प्युठानमा गरेका विकास निर्माणका काम, संसदमा राष्ट्रियता र जनतन्त्रप्रति उठाएको आवाज, भ्रष्टाचारविरोधी छवी र जनतासँग सहजरुपमा घुलमिल हुनसक्ने क्षमताका कारण मतदाताले उहाँलाई रुचाएको गठबन्धनको चुनाव प्रचारमा सहभागी एक नेताले बताए । 
उनले घरदैलोका क्रममा कतिपय स्थानमा पुग्दा लामो समयदेखि एमालेको मतदाता रहेका कतिपय व्यक्तिहरुले विगतमा एमालेलाई दिएको मत खेर गएको भन्दै अब पुनः एमालेलाई भोट नहाल्ने बताएको युगदर्शनसँगको कुराकानीमा जानकारी दिए ।
एमालेले दुई तिहाइको सरकार जोगाउन नसकेको, राजावादी र विदेशी शक्तिलाई बोकेर जनआन्दोलनबाट प्राप्त उपलब्धि उल्टाउन खोजेको, विगतमा दुई पटकसम्म संसद विघटन गरेको एवम् एमालेका पालामा ब्यापक भ्रष्टाचार भएको जस्ता कारणले विगतदेखि एमालेलाई भोट दिँदै आएका मतदाता असन्तुष्ट देखिन्छन् ।
प्युठानमा गठबन्धनको तर्फबाट प्रतिनिधि सभामा पौडेलसँगै प्रदेश सभातर्फ माओवादी केन्द्रका कृष्ण अधिकारी र नेपाली कांग्रेसका रोज राणा उम्मेदवार बन्नुभएको छ ।
प्युठानका सबै वडाहरुमा संयुक्त घरदैलो कार्यक्रम चलिरहेको छ । गठबन्धन दलहरु एकतावद्ध बनेर वडा–टोल तहसम्म प्रचारप्रसारमा लागेको सहभागी कार्यकर्ताहरुले बताएका छन् । शनिबार गठबन्धनका उम्मेदवारसहितको टोलीले मल्लरानी गाउँपालिकामा घरदैलो गरेको छ भने संयुक्त टोलीहरुले प्रत्येक वडामा घरदैलो तथा जनभेटघाट गरिरहेका छन् ।
- एमाले प्युठानका जिल्ला सदस्य वासु गिरी गठबन्धन जिताउने अभियानमा
- प्युठानमा यसरी हुँदैछ दुर्गा पौडेलको घरदैलो
- प्युठानमा गठबन्धनको चुनाव प्रचार शैली : ‘घरदैलो’मा जोड
- प्युठानी जनताको शिर कहिल्यै झुक्न दिने छैन : दुर्गा पौडेल
- प्युठानका स्वतन्त्र उम्मेदवार सुवेदीद्वारा दुर्गा पौडेललाई समर्थन
- प्युठानका सबै पालिकामा गठबन्धनको संयुक्त भेला
