प्युठान । राष्ट्रिय जनमोर्चाका उपाध्यक्ष एवम् प्युठानबाट प्रतिनिधि सभाका वाम–लोकतान्त्रिक गठबन्धनका उम्मेदवार दुर्गा पौडेलले प्युठानी जनताको शिर निहुरिन नदिने प्रतिवद्धता जनाउनुभएको छ ।
शनिबार प्युठान नगरपालिकामा आयोजित संयुक्त कार्यकर्ता भेलालाई सम्बोधन गर्दै उपाध्यक्ष पौडेलले आफूले अहिलेसम्म संसदमा प्रतिनिधित्व गर्दा प्युठानी जनताको शिर झुक्ने कुनै काम नगरेको बताउनुभयो ।
उहाँले संसदमा प्युठानको विकासदेखि राष्ट्रियताको सवालमा जहिल्यै सशक्त रुपमा प्रस्तुत भएको बताउनुभयो ।
‘मैले सांसद हुँदा प्युठानी जनताको शिर निहुरिने काम गरेको छैन । अब पनि तपाइँहरुको शिर झुक्न दिने छैन’ पौडेलले भन्नुभयो, ‘अहिलेसम्म संसदमा आफु्नो क्षमताले भ्याएसम्म प्युठानको विकास, राष्ट्रियताको सवाल, लोकतन्त्रलगायतका विषयमा सशक्त आवाज उठाइरहेको छु । अब पनि यसलाई निरन्तरता मात्रै होइन, थप सशक्त पार्नेछु ।’
पौडेलले संसदमा आफू राजमोको तर्फबाट एक्लै भएको हुनाले तथा प्रतिगमनविरुद्धको आन्दोलनको नेतृत्व गर्नुपर्ने परिस्थितिका कारण सोचेजसरी प्युठानी जनतामाझ आउन नसकेको स्वीकार गर्नुभयो । तर, समय मिल्नासाथ जनताको बिचमा आउने र यहाँको विकास निर्माण, जनताको सुख दुःखमा साथ दिएको स्मरण पनि गर्नुभयो ।
फरक प्रशंगमा पौडेलले एमाले नेता सूर्य थापाले आफूलाई प्युठानी बुहारी भनेकोप्रति आक्रोश व्यक्त गर्नुभयो । उहाँले आफ्नो माइती र घरसमेत प्युठान नै भएको स्पष्ट पार्दै महिलालाई होच्याउने, विभेद गर्ने जस्ता अभिव्यक्ति नदिन चेतावनी दिनुभयो ।
‘मलाई बाहिरबाट आएकी बुहारी र आफूलाई प्युठानको धर्तीपूत्र भनेका रैछन् । यसप्रकारका महिलालाई होच्याउने र विभेद गर्ने पूरुषवादी मानसिकता त्याग्न चेतावनी दिन्छु’ पौडेलले भन्नुभयो, ‘हेक्का रहोस् मेरो माइती चुँजाठाँटी हो, घर ओखरकोट । प्युठानसँग मेरो जन्मदेखिको भावनात्मक सम्बन्ध छ ।’
कार्यक्रममा प्युठान प्रदेश सभा ख का उम्मेदवार रोज राणाले केपी ओलीको प्रतिगामी कदमका कारण वाम–लोकतान्त्रिक गठबन्धन बनाउनुपरेको स्पष्ट पार्नुभयो । उहाँले विदेशी शक्तिहरु नेपालका प्रतिगामी शक्तिलाई उचालेर गणतन्त्र र धर्म निरपेक्षता खत्तम पार्न लागेको भन्दै उनीहरुलाई पराजित गर्न वाम–लोकतान्त्रिक गठबन्धनलाई विजयी बनाउनुपर्नेमा जोड दिनुभयो ।
यस्तै, प्रदेश सभा क का उम्मेदवार प्रकाश अधिकारीले जनआन्दोलनका उपलब्धि जोगाउन जनताले प्रतिगामी शक्तिलाई हराउनुपर्ने बताउनुभयो ।
चुनाव परिचालन समिति प्रदेश ख का संयोजक निमा गिरीको अध्यक्षता तथा राजमो नेता विमल पोखरेलको सञ्चालनमा अघि बढेको कार्यक्रममा राष्ट्रिय जनमोर्चाका लुम्बिनी प्रदेश संयोजक बोमबहादुर खत्री, नेपाली कांग्रेसका नेता शुभाष केसी, माओवादी केन्द्रका नेता प्रभात र एकीकृत समाजवादीका नेता भोजविक्रम बुढाको आतिथ्यता रहेको थियो ।
आजै प्युठानको खलंगा र ऐरावतिमा पनि संयुक्त भेला भएको अखिल (छैठौं) का महासचिव शुवास जिसीले जानकारी दिनुभयो ।
