टेकराज भुसाल, नुवाकोट (अर्घाखाँची) ।
‘दसैँतिहारको उमङ्ग, खेलकुद र संस्कृतिसँगै हाम्रो एकताको रङ’ भन्ने मूल नाराका साथ फलामखिली युथ स्पोट्र्स क्लबको आयोजनामा मातृभूमि–प्रवासी पाँचौँ पिवाइएससी कप–२०८३ सुरु भएको छ ।
२०८३ कात्तिक १२ गते बिहीबारदेखि सुरु भएको प्रतियोगितासँगै लोकसांस्कृतिक कार्यक्रम, वडास्तरीय पुरुष तथा खुला महिला भलिबल प्रतियोगिता सञ्चालन भइरहेको छ ।
चार दिनसम्म सञ्चालन हुने खेलकुद प्रतियोगिता तथा सांस्कृतिक कार्यक्रमको भूमिकास्थान नगरपालिकाका नगरप्रमुख झविलाल थापाले गर्नुभएको थियो ।
कार्यक्रमको उद्घाटन गर्दै नगरप्रमुख थापाले खेलकुदले युवामा अनुशासन, सहकार्य र आपसी सद्भावको भावना विकास गर्नुका साथै स्थानीय प्रतिभाको पहिचान र प्रवद्र्धनमा महत्त्वपूर्ण भूमिका खेल्ने बताउनुभयो ।
उहाँले यस्ता प्रतियोगिताले सामाजिक एकता कायम राख्न र स्थानीय कला तथा संस्कृतिको संरक्षण गर्न सहयोग पुग्ने धारणा व्यक्त गर्नुभयो ।
उद्घाटन समारोहमा जिल्ला भलिबल सङ्घ अर्घाखाँचीका अध्यक्ष भरत पुनमगर तथा सङ्घका निवर्तमान कोषाध्यक्ष प्रेमबहादुर आलेले पनि मन्तव्य राख्नुभएको थियो ।
फलामखिली युथ स्पोट्र्स क्लबका अध्यक्ष हरि आलेको अध्यक्षता तथा प्रकाश मगरको सञ्चालनमा सम्पन्न उद्घाटन समारोहमा नगर उपप्रमुख बालाकृष्ण बन्जाडे, ४ नम्बर वडाका वडाअध्यक्ष बाबुराम पन्थी, ५ का वडाका वडाअध्यक्ष जयगोपाल श्रेष्ठलगायतको उपस्थिति रहेको थियो ।
प्रतियोगिताअन्तर्गत वडास्तरीय पुरुष भलिबलतर्फ १४ समूह तथा खुला महिला भलिबलतर्फ ६ समूहको सहभागिता रहेको छ ।
प्रतियोगिताले स्थानीय खेलाडीलाई आफ्नो प्रतिभा प्रदर्शन गर्ने अवसर प्रदान गर्नुका साथै खेलकुदप्रति युवाको आकर्षण बढाउने अपेक्षा गरिएको छ ।
पुरुष भलिबल प्रतियोगितामा प्रथम हुने टोलीले ५० हजार, द्वितीयले ३० हजार, तृतीयले २० हजार र सान्त्वना हुने टोलीले १० हजार रुपैयाँ नगद पुरस्कार प्राप्त गर्नेछन् ।
त्यस्तै, महिला भलिबल प्रतियोगितामा प्रथम हुने टोलीले १५ हजार, द्वितीयले १० हजार, तृतीयले पाँच हजार र सान्त्वना हुने टोलीले तीन हजार रुपैयाँ नगद पुरस्कार प्राप्त गर्नेछन् । दुवै विधाका विजेता टोलीले नगद पुरस्कारसँगै ट्रफी, मेडल र प्रमाणपत्रसमेत प्राप्त गर्ने आयोजकले जनाएको छ।
खेलकुदसँगै स्थानीय कला, संस्कृति र मनोरञ्जनलाई जोड दिने उद्देश्यले कात्तिक १५ गते विशेष लोकसांस्कृतिक कार्यक्रमसमेत आयोजना गरिनेछ ।
कार्यक्रममा कलाकार एलिना रायमाझी, गायक विशाल रायमाझीलगायतका कलाकारको प्रस्तुति रहने क्लबका अध्यक्ष आलेले जानकारी दिनुभयो ।
