काठमाडौँ । चक्रवात ‘अर्नब’ को सम्भावित प्रभावका कारण देशका प्रमुख राजमार्गहरूमा पहिरोको उच्च जोखिम बढेको बताइएको छ।
जल तथा ऊर्जा आयोगको सचिवालय अन्तर्गतको जलविज्ञान तथा जलस्रोत अनुसन्धान केन्द्रले एक सूचना जारी गर्दै विशेष गरी नारायणी, बागमती र कोशी नदी जलाधार तथा आसपासका क्षेत्रमा वर्षा भई राजमार्ग क्षेत्रमा पहिरोको जोखिम बढ्न सक्ने चेतावनी दिएको हो।
केन्द्रका अनुसार चक्रवातको प्रभावले पहाडी तथा भिरालो भूबनोट भएका सडकखण्डहरूमा पहिरो जाने, ढुङ्गा खस्ने तथा सडक भासिने सम्भावना रहेको छ। नदी किनारका सडकखण्डहरूमा पानीको सतह बढेर बाढी तथा कटानको जोखिम हुने तथा पहिरो र बाढीका कारण सडक अवरुद्ध हुँदा यातायात सञ्चालन र अत्यावश्यक वस्तुको ढुवानीमा समेत असर पर्न सक्नेछ।
साथै, सानाठुला खहरे खोला र कल्भर्टमा पानीको बहाव बढेर सडक क्षति हुन सक्ने सम्भावना औँल्याइएको छ। जोखिममा पर्न सक्ने प्रमुख राजमार्ग खण्डहरूमा नारायणगढ–मुग्लिन सडक खण्ड (त्रिशूली र नारायणी नदी किनार), कोशी राजमार्ग तथा सिद्धार्थ राजमार्गका संवेदनशील पहिरो क्षेत्र रहेका छन्।
यसैगरी कान्ति राजमार्ग, अरनिको राजमार्ग तथा बागमती जलाधार क्षेत्रसँग जोडिएका सडक खण्ड र अन्य पहिरोको इतिहास भएका तथा नदी किनारका राजमार्ग खण्डहरूमा पनि उच्च सतर्कता अपनाउनुपर्ने उल्लेख छ।
