जेरुसेलम । इजरायलको संसदीय निर्वाचनमा प्रधानमन्त्री बेन्जामिन नेतान्याहूको गठबन्धनले बहुमत गुमाएपछि देशको राजनीति थप विवादित बनेको छ ।
निर्वाचन परिणामपछि विदेशी हस्तक्षेपको आरोप लगाएका नेतान्याहूको विपक्षी नेता तथा अरब समुदायका राजनीतिक दलका नेताले चर्को आलोचना गरेका छन् ।
नेतान्याहूको पार्टी लिकुडले इजरायलका अरब नेतृत्वका दलहरूले निर्वाचनमा भोट चोरी गरेको आरोप लगाएको छ । ती दलले कतार र टर्कीबाट अवैध आर्थिक सहयोग प्राप्त गरेको हुन सक्ने आशङ्कामा इजरायलको आन्तरिक सुरक्षा निकाय सिनबेटले अनुसन्धान थालेको छ तर कतारको विदेश मन्त्रालयले उक्त आरोपलाई हास्यास्पद र खतरनाक भन्दै अस्वीकार गरेको छ । उसले कतार विरुद्ध इजरायली राजनीतिज्ञले दुष्प्रचार अभियान चलाएको आरोपसमेत लगाएको छ ।
इजरायलका प्रमुख विपक्षी नेता गादी आइजेनकोटले पनि निर्वाचनपछि राजनीतिक वातावरण प्रभावित पार्ने प्रयास गरेको भन्दै नेतान्याहूको आलोचना गरेका छन् ।
नेतान्याहूका आलोचकले विदेशी हस्तक्षेपको आरोपलाई अरब नेतृत्वका राजनीतिक दलको वैधता कमजोर पार्ने प्रयासका रूपमा व्याख्या गरेका छन् । यसले विपक्षी नेता आइजेनकोटलाई अरब दलसँग मिलेर सरकार बनाउने राजनीतिक बाटोसमेत बन्द गर्न सक्ने उनीहरूको भनाइ छ । अहिले आइजेनकोट गठबन्धनका लागि सत्तामा पुग्ने सम्भावित बाटो यही मात्रै देखिएको छ ।
सरकार गठनमा निर्णायक अरब दल
निर्वाचनको अन्तिम परिणामअनुसार नेतान्याहूको गठबन्धन र यहुदी विपक्षी गठबन्धन दुवैले संसदमा बहुमत प्राप्त गर्न सकेनन् । अरब समुदायको उल्लेख्य मतदानका कारण दुई अरब नेतृत्वका राजनीतिक समूह जोइन्ट लिस्ट र रामले अपेक्षाभन्दा राम्रो प्रदर्शन गर्दै संसदमा कीर्तिमानी १९ सिट जितेका छन् । इजरायलको एक सय २० सदस्यीय संसद् नेसेटमा उनीहरूले प्राप्त गरेको यो अहिलेसम्मकै ठुलो प्रतिनिधित्व हो ।
निर्वाचन परिणामअनुसार नेतान्याहूको गठबन्धनले ५३ सिट प्राप्त गरेको छ भने उनका प्रतिस्पर्धी गादी आइजेनकोट नेतृत्वको विपक्षी गठबन्धनले ४८ सिट जितेको छ ।
अरब दलले १९ सिट जितेपछि सरकार गठनमा उनीहरूको भूमिका निर्णायक हुन सक्ने देखिएको छ । कुनै पनि गठबन्धनले स्पष्ट बहुमत नल्याएकाले उनीहरू सम्भावित सत्तासमीकरणका निर्णायक शक्ति बनेका छन् । (एजेन्सी)
