काठमाडौँ । नेकपा (मसाल) ले दार्चुलामा भारतले सीमाक्षेत्रका विस्फोट गराउँदा एक बालकको मृत्यु तथा एक बालिका घाइते भएको सन्दर्भमा आवश्यक पहल गर्न नेपाल सरकारलाई आग्रह गरेको छ ।
महामन्त्री मोहनविक्रम सिंहको हस्ताक्षरमा २०७९ कात्तिक १२ गते जारी प्रेसवक्तव्यमार्फत् पार्टीले यस्तो आग्रह गरेको हो ।
अन्तर्राष्ट्रिय सीमाक्षेत्रका भौतिक संरचना निर्माण गर्दा एकार्कालाई असर पुर्याउन नहुने नियमतर्फ इङ्गित गर्दै मसालले भारतको यस्तो कदमको विरोध तथा भत्र्सना गरेको छ । वक्तव्यमा त्यसबारे नेपाल सरकारले भारत सरकारसित तुरुन्त पहल गर्न आग्रह गरिएको छ ।
मृतक नौ वर्षीय बालक पवन महराप्रति श्रद्धाञ्जली, शोकसन्तप्त परिवारप्रति समवेदना प्रकट गरिएको उक्त वक्तव्यमा मृतक तथा घाइते बालिका सरिना महरालाई क्षतिपूर्तिको माग गरिएको छ ।
प्रेसवक्तव्यमा भनिएको छ :
“दार्चुलामा महाकाली नदीपारि तावाघाट–लिपुलेक सडक चौडा गर्ने भनी भारतद्वारा सीमाक्षेत्रमा विस्फोट गराउँदा उछिट्टिएर आएको ढुङ्गाले दार्चुलाको ब्यास गाउँपालिका–२ दुम्लिङका ९ वर्षीय बालक पवन महराको मृत्यु हुनुका साथै १४ वर्षीय सरिना महरा घाइते भएकी छिन् ।
अन्तर्राष्ट्रिय सीमाक्षेत्रमा कुनै पनि भौतिक संरचना निर्माण गर्दा सम्बन्धित मुलुकले एकार्कालाई असर पुर्याउने कार्य गर्न मिल्दैन । कुनै विस्फोट गराउनैपर्ने बाध्यात्मक अवस्था भएमा दुबै देशको समझदारीमा आवातजावतमा रोक लगाई गर्नुपर्ने नियमको उल्लङ्घन गरी सीमाक्षेत्रमा नेपाललाई सूचना नै नदिई विस्फोट गराउने भारतको उक्त कार्यको हामीले विरोध र भत्र्सना गर्दछौँ । उक्त घटनाबारे तुरुन्त आवश्यक पहलकदमी उठाउनका लागि हामीले नेपाल सरकारको ध्यान आकर्षित गर्दै मृतक र घाइतेका परिवार जनलाई क्षतिपूर्ति दिलाउनसमेत पहल गर्नका लागि सरकारसित माग गर्दछौँ ।
अन्तमा, मृतकप्रति श्रद्धाञ्जली व्यक्त गर्दै घाइतेको शीघ्र स्वास्थ्यलाभको कामनासहित सन्तप्त परिवार जनप्रति हार्दिक समवेदना प्रकट गर्दछौँ ।”
भारतीय पक्षले विस्फोट गराएको ढुंगा लागेर नेपाली बालकको मृत्यु
