बुटवल । राष्ट्रिय जनमोर्चाका लुम्बिनी प्रदेश सभा सदस्य तारा जिसीले पार्टीका जनप्रतिनिधिहरुलाई आफ्नो संख्या कम देखेर नआत्तिन सुझाव दिनुभएको छ ।
बुटवलमा सुरु राजमो जनप्रतिनिधिको तीने दिने प्रशिक्षण उद्घाटनका क्रममा राजमो केन्द्रीय सदस्य समेत रहेकी जिसीले संख्यात्मक रुपमा थोरै भएपनि राम्रो काम गरेर देखाउनुपर्ने बताउनुभयो ।
‘हामी राजमोबाट निर्वाचित जनप्रतिनिधिहरु थोरै छौँ । म पनि प्रदेश सभामा आउँदा ८० जनामा एक्लै थिएँ’ जिसीले भन्नुभयो, ‘थोरै भए पनि आत्तिने होइन । हामीले पार्टीको निर्देशन अनुसार अरु भन्दा राम्रो काम गरेर देखाउनुपर्छ ।’
उहाँले अहिलेसम्म जनमोर्चाका जनप्रतिनिधिहरुलाई कसैले पनि औँला उठाउन नसकेको स्पष्ट पार्दै स्थानीय जनप्रतिनिधिलाई पनि कार्यकाल सकेर जाँदा जनताले थप माया गर्ने अवस्था हुनुपर्ने बताउनुभयो ।
यस्तै, राष्ट्रिय जनमोर्चाका केन्द्रीय सदस्य एवम् प्युठानको मल्लरानी गाउँपालिकाका अध्यक्ष कृष्णध्वज खड्काले राजमोले नेतृत्व गरेको मल्लरानी देशभरीमै शून्य बेरुजु भएको र उत्कृष्ट काम गर्ने गाउँपालिकामा पर्ने बताउनुभयो ।
उहाँले काभ्रेको रोसी गाउँपालिकाबाट २६ जनाको टोली मल्लरानी आएको जानकारी दिँदै संख्यामा धेरै हुनु भन्दा पनि राम्रो काम गर्नसक्नुपर्ने बताउनुभयो । उहाँले पार्टी सरकारमा जाँदासमेत पार्टी अध्यक्ष चित्रबहादुर केसीले उपप्रधानमन्त्री हुँदाहुँदै पनि सरकारको गलत कामको विरोध गरेको स्मरण गर्नुभयो ।
यस्तै, अर्घाखाँचीको भूमिकास्थान नगरपालिकाका प्रमुख झविलाल थापाले अरु पार्टीका जनप्रतिनिधि र राष्ट्रिय जनमोर्चाका जनप्रतिनिधिबीच फरक हुनुपर्ने बताउनुभयो ।
उहाँले विगतमा राजमोमा छँदासम्म उत्कृष्ट भूमिका खेलेका जनप्रतिनिधिहरु पार्टी छोडेर गएपछि बिग्रने गरेको उल्लेख गर्दै पार्टीको स्पष्ट वैचारिक दृष्टिकोणका कारण त्यो सम्भव भएको बताउनुभयो ।
