चितवन । चितवनको भरतपुरमा बिहीबार पाँचदलीय गठबन्धनले चुनावी सभाको आयोजना गरेको छ । तर, सभास्थल पानीको तालमा परिणत भएपछि गठबन्धनका नेता कार्यकर्तालाई तनाव भएको छ ।
सभा गर्न मञ्च बनाइएको भरतपुरस्थित केन्द्रीय बस टर्मिनलको खाली क्षेत्र डुबानमा परेको हो । सभा गर्ने ठाउँमा पानी भरिएपछि गठबन्धन दलले विकल्पको खोजी गरेका छन् ।
प्रधानमन्त्रीलगायत शीर्ष तहका नेताहरुले सम्बोधन गर्ने तयारीका साथ बनाइएको मञ्चस्थल डुबानमा परेपछि सहरी विकास योजनाले गिज्याएको सामाजिक सञ्जालमा टिप्पणी हुन थालेको छ ।
इन्जिनियर एवम् राजनीतिक विश्लेषक डा. सूर्यराज आचार्यले ट्वीट गर्दै ‘योजनाबिनाको बेढंगी विकास’ बताउनुभएको छ ।
डा. आचार्य लेख्नुहुन्छ, ‘भरतपुरमा उल्कै विकास भएको छ’ भन्ने प्रचार समेतका लागि हुँदै गरेको सभाको सभास्थलले सभाको पूर्वसन्ध्यामा ‘लौ हेर, तिमेरूले बजेट सकाएर गरेको विकास कस्तो हो ? भनेर देखाई दिएछ ! शहरी विकासको स्पष्ट योजनाबिना हचुवा आयोजना टिपेर बजेट सकाउने विकासे शैलीको परिणाम !’
डा. आचार्य अगाडि लेख्नुहुन्छ, ‘यो डुबान हुनु पर्ने ठाउँ हैन। बेढंगीको ठेकेदारको मात्र भर परेर बिना नक्सा(डिजाइन ठूलो भवन निर्माण गर्न खोज्दा आईपर्ने समस्या जस्तै योजना बिनाको हाम्रो शहरी विकासका बजेट खर्च गर्ने टुक्रे आयोजनाले नसोचेका समस्या निम्त्याँउँदै छन्। बलैमा पाठ सिकौं।’
यो डुबान हुनु पर्ने ठाउँ हैन।
बेढंगीको ठेकेदारको मात्र भर परेर बिना नक्सा-डिजाइन ठूलो भवन निर्माण गर्न खोज्दा आईपर्ने समस्या जस्तै योजना बिनाको हाम्रो शहरी विकासका बजेट खर्च गर्ने टुक्रे आयोजनाले नसोचेका समस्या निम्त्याँउँदै छन्।
बेलैमा पाठ सिकौं। https://t.co/J8JaCuQAOE— Surya Raj Acharya (@SuryaRAcharya) May 5, 2022
गठबन्धनको सभालाई प्रधानमन्त्री एवम् नेपाली कांग्रेसका नेता शेरबहादुर देउवा, माओवादी केन्द्रका अध्यक्ष पुष्पकमल दाहाल ‘प्रचण्ड’, एकीकृत नेकपा समाजवादीका अध्यक्ष माधवकुमार नेपाल, कांग्रेसका वरिष्ठ नेता रामचन्द्र पौडेललगायतका नेताले सम्बोधन गर्ने कार्यक्रम छ।
यस्तै, राष्ट्रिय जनमोर्चाका केन्द्रीय सदस्य डम्बर पुरी सभामा सहभागी हुनुहुनेछ । भरतपुर महानगरपालिकाको प्रमुख उपप्रमुखमा राष्ट्रिय जनमोर्चाले गठबन्धन दलका उम्मेदवारलाई समर्थन गरेको छ भने वडातहमा सहमति भएको छैन ।
