जुमान सिंह केसी, प्युठान ।
प्युठानको मल्लरानी गाउँपालिकामा एमालेका ७० जना कार्यकर्ता राष्ट्रिय जनमोर्चामा प्रवेश गरेका छन् ।
शनिबार राष्ट्रिय जनमोर्चा मल्लरानी गाउँ समिति र अखिल नेपाल युवक संघले मल्लरानी गाउँपालिकाको सरङकोट जोरपोखरीमा आयोजना गरेको एमसीसी विरुद्धको मार्चपास कार्यक्रममा एमाले कार्यकर्ताहरू राजमोमा प्रवेश गरेका हुन् ।
राजमोमा प्रवेश गर्नेहरुमा मल्लरानी गाउँपालिका वडा नं ५ का कार्यकर्ताहरु छन् । उनीहरुलाई राष्ट्रिय जनमोर्चाका केन्द्रीय सदस्य कृष्ण खड्काले स्वागत गर्नुभएको छ ।
अखिल नेपाल युवक संघको एमसीसीविरुद्ध देशव्यापी मार्चपास कार्यक्रम अनुसार मल्लरानीमा सो कार्यक्रम आयोजना गरिएको थियो ।
कार्यक्रमलाई सम्बोधन गर्दै राजमो केन्द्रीय सदस्य खड्काले राष्ट्रघाती एमसीसी संसदबाट जवर्जस्ती पास गरिएको भन्दै यसको खारेजीका लागि आम जनता सडकमा आउनु पर्ने बताउनु भयो । उहाँले आफूलाई हात्ती पार्टी भन्नेहरु विदेशीको दलाल बन्न पुगेको आरोप लगाउनु भयो।
विरोधसभामा राजमोका लुम्बिनी प्रदेश अध्यक्ष बोम बहादुर खत्रीले अमेरिकी सैनिक नेपालमा राख्ने र नेपाललाई अस्तब्यस्त गराउने खेल अनुरुप एमसीसी आएको भन्दै पटकपटक नेपाली दलालहरु विदेशीलाई खुसी पर्ने र आफूहरु सत्ता टिकाउने खेलमा लाग्ने गरेको वताउनु भयो ।
अमेरिकी साम्राज्यवाद जहाँ पुगेको छ, त्यहाँ अशान्ति, द्वन्द्व, हिंसा भएको भन्दै साम्राज्यवादका विरुद्ध जस्तोसुकै मूल्य चुकाउन परेपनि पछि नपर्ने बताउनु भयो ।
साथै खत्रीले गाउँपालिका अध्यक्ष लगाएत माथी भएको अराजक घटनाको विरोध गर्दै दोषीहरु कानुनको दायरामा अझै आउन नसकेकोप्रति कडा आलोचना गर्नु भएको थियो ।
कार्यक्रममा जिल्ला समन्वय समितिका प्रमुख केशवराज आचार्य, राजमो जिल्ला सदस्य गुणेन्द्र बस्नेत लगाएतले मन्तव्य राख्नु भएको थियो ।
सभाको अध्यक्षता सूर्य बहादुर नेपालीले गर्नु भएको थियो भने सञ्चालन कमल पौडेलले गर्नु भएको थियो ।
