काबुल । अफगानिस्तानको कामचलाउ मन्त्रिपरिषद्मा महिला उपस्थिति शून्य छ ।
अघिल्लो महिना सत्ता कब्जा गरेर केही हप्ताअगाडि कामचलाउ सरकार बनाएको तालिबानले सेप्टेम्बर २१, २०२१ का दिन मन्त्रिपरिषद् विस्तार गर्दा पनि महिलालाई सहभागी गराएको छैन ।
इस्लामिक इमरेट्समा महिलालाई मन्त्री बनाउन नमिल्ने मान्यताअनुरूप महिलालाई मन्त्रिपरिषद्मा सहभागी नबनाएको बताइएको छ । तर सूचना तथा सञ्चार राज्यमन्त्री जाबिहुल्लाह मुजाहिद्दिनले भने पछाडी पारिएको वर्ग तथा समुदायको सहभागितालाई ध्यान दिएर मन्त्रिपरिषद् विस्तार गरिएको दाबी गर्नुभयो ।
विस्तारित मन्त्रिपरिषद्मा हाजी नुरुद्दिन अजिजी कार्यवाहक अर्थमन्त्री, हाजी मोहम्मद बसिर अर्थ उपमन्त्री, क्वालान्डर एबाड कार्यवाहक जनस्वास्थ्य मन्त्री, अब्दुल्बारी ओमर जनस्वास्थ्य उपमन्त्री रहनुभएको छ ।
सार्वजनिक भएको मन्त्रीहरूको सूचीमा एक जना पनि महिलाको नाम छैन । मन्त्रिपरिषद्मा अहिले ३३ जना रहेका छन् । मन्त्रिपरिषद्मा महिला सहभागिताको बारेमा सोधिएको प्रश्नमा मन्त्री मुजाहिद्दिनले महिलाको विषयमा अहिलेको मन्त्रिपरिषद्ले नै उच्च प्राथमिकताका साथ काम गर्ने दाबी गर्नुभयो ।
महिलाका सबै माग र बालिकाको शिक्षाको बारेमा समेत अहिलेको काम चलाउन सरकारले नै काम गर्ने उहाँको भनाइ थियो ।
‘हामीले नै महिलाका माग र उनीहरूको शिक्षाका बारेमा पर्याप्त काम गर्ने छौँ’ पत्रकारसँग उहाँले भन्नुभयो ।
अफगानिस्तानमा तालिबानले सत्ता लिएपछि महिला अधिकार कुण्ठित गरेको भन्दै सर्वत्र आलोचना भइरहेका बेला विस्तारित मन्त्रिपरिषद् पनि महिलाविहीन भएको हो । महिला र शिक्षा अधिकारलगायत आधारभूत अधिकार तथा स्वतन्त्रता कुण्ठित भएमा अफगानिस्तानको तालिबान सरकारलाई मान्यता नदिने र सहयोग नगर्ने अन्तर्राष्ट्रिय समुदाय र विभिन्न देशले चेतावनी दिदै आएका छन् ।
तर मन्त्री मुजाहिद्दिनले भने आफ्नो सरकारलाई अन्तर्राष्ट्रिय समुदायले पनि स्वीकार गर्दै सहयोग र सहकार्य आदानप्रदान हुने विश्वास व्यक्त गर्नुभयो । उहाँले देशभित्रको आन्तरिक आवश्यकता पूरा गर्न आन्तरिक अर्थतन्त्रले थेग्न सक्ने दाबी पनि गर्नुभयो । (रासस/एएनआई)
