भरतपुर । जिल्ला निर्वाचन कार्यालय चितवनले तीन हजार तीन सय ६२ मतदाताको नाम मतदाता सूचीबाट हटाएको छ ।
मतदाता नामावली अध्यावधिकअन्तर्गत दोहोरो दर्ता भएका, मृत्यु भएका, नागरिकता परित्याग गरेका मतदाताको नामावली हटाइएको हो ।
यसरी हटाइनेमा दोहोरो दर्ता भएका एक हजार नौ सय ४३ जनाको हटाइएको हो । आयोगको प्रणालीबाट जाँच गर्दा दोहोरो कायम भएको भेटिएका उनीहरूको नाम हटाइएको हो ।
कार्यालयका प्रमुख भीमसेन कार्कीका अनुसार भदौ १२ गतेसम्म मृत्यु दर्ता गरेका एक हजार तीन सय ८० जना र नागरिकता परित्याग गरेका ३९ जनाको समेत मतदाता नामावलीबाट नाम हटाइएको छ ।
मृत्यु भएकाको सम्बन्धित वडाकार्यालय र मृतकका परिवारले कार्यालयमा दर्ता गरेको मृत्यु प्रमाणपत्रका आधारमा नाम हटाइएको छ ।
नागरिकता परित्याग गर्नेहरूको जिल्ला प्रशासन कार्यालयबाट प्राप्त विवरणका आधारमा हटाइएको उनले बताए ।
गत फागुनमा भएको प्रतिनिधिसभा निर्वाचन जिल्लामा चार लाख ४२ हजार ८२ मतदाता रहेका थिए । फागुन २१ गतेको मतदानपछि १३ हजार एक सय ३४ जना मतदाता थपिएका छन् ।
