नैरोबी । अनुयायीलाई येशुलाई भेट्न भोकै बसेर मर्न बाध्य पारेको अभियोगमा केन्याली धर्मगुरु पास्टर पल म्याकेन्जी एक सय ९१ जनाको हत्यामा दोषी ठहर भएका छन् । सन् २०२३ मा उनका अनुयायी बस्ने क्षेत्रमा चार सयभन्दा बढी शव फेला परेका थिए ।
न्यायाधीश डायना काभेद्जाले गुड न्युज इन्टरनेसनल चर्चका नेता म्याकेन्जीले अनुयायीलाई मृत्युसम्म उपवास बस्न बाध्य पार्ने योजनाबद्ध प्रणाली सञ्चालन गरेको ठहर गरे । अदालतका अनुसार सुरुमा बालबालिकालाई भोकै बस्न लगाइएको थियो । भाग्न वा खाना खान खोज्नेलाई रोक्न सुरक्षाकर्मी खटाइएको र उनीहरूलाई कुटपिटसमेत गरिएको थियो ।
म्याकेन्जीले अनुयायीलाई शिक्षा र स्वास्थ्य सेवाबाट टाढा रहन निर्देशन दिनुभएको थियो । चिकित्सा उपचारलाई शैतानको साधनका रूपमा प्रस्तुत गरिएको न्यायाधीशले बताए ।
सन् २०२३ मा केन्याको तटीय किलिफी काउन्टीस्थित साकाहोला जङ्गलका उथला चिहानबाट चार सयभन्दा बढी शव निकालिएका थिए । घटनापछि म्याकेन्जी र उहाँकी श्रीमतीसहित दर्जनौँ व्यक्तिमाथि अभियोग लगाइएको थियो । म्याकेन्जीले भने आफूमाथिका आरोप अस्वीकार गर्दै अनुयायीलाई भोकै बस्न बाध्य नपारेको दाबी गरेका थिए ।
घटनामा आमा, दाइ र दुई भतिजा गुमाएका विलियम पोन्डा न्गालाले फैसलाले राहत दिएको बताए । उनले यसले भविष्यमा धार्मिक नेताबाट हुने अनुयायीको शोषण रोक्न सन्देश दिने आशा व्यक्त गरे ।
२०२५ को अप्रिलमा पुनरावेदन अदालतले म्याकेन्जी र सहअभियुक्त विरुद्ध एक सय ९१ ओटा हत्या अभियोग अघि बढाउन अनुमति दिएको थियो । यसअघि उच्च अदालतले अभियोग १२ ओटामा सीमित गर्न निर्देशन दिए पनि पुनरावेदन अदालतले कानुनले अभियोगको सङ्ख्या नतोकेको ठहर गरेको थियो ।
म्याकेन्जीको सजाय निर्धारणसम्बन्धी सुनुवाइ अक्टोबर ३० मा हुने र सजाय नोभेम्बर ६ मा सुनाइने तय भएको छ । (रासस/एपी)
