काठमाडौँ । राष्ट्रिय जनमोर्चाले रसुवा बाढीका पीडितका लागि राहत सहयोग जुटाउने भएको छ । अध्यक्ष चित्रबहादुर केसीको हस्ताक्षरमा २०८३ भदौ १३ गते शनिवार प्रेसवक्तव्य जारी गर्दै राजमोले सो जानकारी दिएको हो ।
राजमोले आफूद्वारा सङ्कलित राहत सम्भव भएसम्म सिधै पीडितलाई वितरण गर्ने, त्यस्तो गर्नु सम्भव नभए सरकारलाई बुझाउने बताएको छ । त्यस सन्दर्भमा गत कालमा जस्तो अहिले राहतमा अनियमितता नहुने आशासमेत गरेको छ । पार्टीले राहत सङ्कलनमा सहयोग गर्न आमजनतासहित सबैसित अपिल गरेको छ ।
बिपद् व्यवस्थापन वा क्षति न्यूनीकरण गर्न सरकारले बेलैमा ध्यान दिनुपर्ने आवश्यकतामा जोड दिँदै राजमोले आगामी दिन यसबारे त्यतातर्फ गम्भीरतापूर्वक विचार गर्नुपर्ने बताएको छ ।
मृतकप्रति श्रद्धाञ्जली, शोकसन्तप्त परिवारप्रति समवेदना, घाइतेको उपचार तथा बेपत्ताको उद्धारमा जोड दिइएको उक्त प्रेसवक्तव्यको पूर्ण पाठ यस्तो छ–
“भोटेकोशी बाढीबाट पीडित जनताको राहत र उद्धारको जिम्मेवारी देशको अगाडि उभिएको छ । देशमा आएको यो गम्भीर बिपद्बाट पीडित जनताका राहत र पुनरुद्धारका लागि नेपाल सरकार, सम्पूर्ण देशवासी, विश्वभरि छरिएर रहेका नेपालीका साथै मित्रराष्ट्रसमेतको हामीले गम्भीर रूपले ध्यान आकषित गर्दछौँ । यस सन्दर्भमा हाम्रो पार्टीको तर्फबाट पनि उक्त बाढीबाट पीडित जनताका पुनरुद्धारका साथै राहत सहयोग जुटाउने प्रयास अगाडि बढाइएको छ । हामीले देशभरि र प्रवासमा रहेका सबै कार्यकर्ता, समर्थक र शुभेच्छुकसित उक्त बाढीपीडित जनताको राहत र पुनरुद्धारका लागि बढीभन्दा बढी रकम सङ्कलन गर्न हार्दिक अपिल गर्दछौँ । त्यसरी सङ्कलन भएको रकमलाई हामीले सिधै पीडित जनताको बिचमा पुर्याउने प्रयत्न गर्नेछौँ वा त्यसो गर्न सम्भव नभएमा नेपाल सरकारलाई हस्तान्तरण गरिनेछ । त्यसरी सङ्कलित रकम सरकारलाई हस्तान्तरण गरिएपछि सरकारले पीडित जनताको राहत र पुनरुद्धारमा लगाउनेछ भन्ने हामीले विश्वास गर्दछौँ । यद्यपि विगतका कतिपय सरकारद्वारा विभिन्न बिपद् वा प्रकोपमा सहयोगदाता वा जनताबाट भएका सहयोग वा राहतमा दुरुपयोग वा भ्रष्टाचार हुने गरेका कैयौँ उदाहरण पनि छन् । यदि त्यही प्रकारका घटना अहिले पनि दोहोरिन गए भने सहयोग वा राहतको सदपुयोग नहुने कुरा निश्चित छ । हामीले आशा गर्दछौँ कि विगतका त्यस प्रकारका दुरुपयोग र भ्रष्टाचारका घटना अहिले दोहोरिने छैनन् ।
हामीले भोटेकोशी बाढीबाट पीडित जनताको लागि राहत र पुनरुद्धारसमेतको लागि बढीभन्दा बढी सहयोग गर्नका लागि आम जनतासित पनि अपिल गर्दछौँ । सबै राजनीतिक संस्था, विभिन्न सङ्घसंस्था, व्यापारी, व्यवसायी, उद्योगी, सबै पेसागत सङ्घसंस्थालाई पनि यस बिपद्को घडीमा पीडित जनतासित ऐक्यबद्धता कायम गर्दै सहयोग वा राहत उपलब्ध गराउन हामीले अपिल गर्दछौँ ।
भोटेकोशीमा यति भयानक बाढी आउनुको कारणबारे गम्भीर अध्ययनको आवश्यकता छ । विश्वमा आएको पर्यावरणीय परिवर्तनका गम्भीर नकारात्मक असर नेपालमा पनि देखा पर्दै आएका छन् । जलवायुमा आएको परिवर्तनले हाम्रो देशमा पार्ने विनाशकारी असरबारे सरकारले गम्भीर ध्यान दिएको पाइन्न । नागरिक तहमा पनि त्यसबारे गहिरा अध्ययन भएका छैनन् । यसले गर्दा बेलाबेलामा नेपाली जनता विभिन्न विनाशकारी प्राकृतिक प्रकोपको सिकार हुनुपरिरहेको छ । सही सूचनाको अभाव हुनु, ठोस अध्ययन नहुनु, सम्भावित प्राकृतिक चुनौतीको पहिचान नगर्नु र खतरासित प्रतिरोध गर्ने पूर्वयोजना र सुरक्षा प्रणालीलाई व्यवस्थित नगरिनुले देशले विभिन्न समयमा ठुलो धनजनको क्षति बेहोर्नुपरेको छ । प्राकृतिक प्रकोपका समस्या र जोखिमलाई मानवजातिले न्यूनीकरण गर्न सक्छ तर त्यसका लागि योजनाबद्ध प्रकारले सम्भावित खतराको अध्ययन र सुरक्षा योजनालाई सरकारले गम्भीरतापूर्वक कार्यान्वयन गर्नुपर्ने आवश्यकता हुन्छ । यसो गर्न सकेमा भविष्यमा प्राकृतिक प्रकोपबाट हुने क्षतिलाई न्यूनीकरण गर्नु सम्भव हुनेछ । हामीले सरकारले यतातिर पनि ध्यान केन्द्रित गर्नुपर्ने आवश्यकतामा जोड दिन्छौँ ।
अन्तमा भोटेकोशी बाढीद्वारा निधन भएका सबैप्रति श्रद्धाञ्जली अर्पण गर्दै घाइते व्यक्तिको शीघ्र उद्धार र राहतको लागि पनि सरकारसित अनुरोध गर्दछौँ । त्यसका साथै बाढीद्वारा पीडित जनताको राहत र पुनरुद्धारसमेतका लागि हामीले सबैसित पुन: अनुरोध गर्दछौँ ।”